Saryaǵash qalasynyń ortalyq meshiti janyndaǵy musylman zıraty jabylmaq
11:54, 02 Naýryz 2023
ASTANA. QazAqparat – Saryaǵash qalasynyń Ismaılov kóshesi boıyndaǵy ortalyq meshit mańynda ornalasqan musylman zıraty jabylýy múmkin. Bul týraly «Ashyq» NQA portalynda jarııalanǵan qala ákimi Muhıt Dosýpovtyń sheshim qujatynda jazylǵan, dep habarlaıdy QazAqparat tilshisi.
«Saryaǵash qalasy turǵyndarynyń pikirin eskere otyryp jáne Saryaǵash qalasynyń ortalyq meshiti janynda ornalasqan zırattyń aýmaǵynda marqum bolǵandardy jerleýge múmkindik bolmaýyna baılanysty ortalyq meshittiń janynda ornalasqan musylman zıraty jabylsyn», - dep jazylǵan shahar ákiminiń sheshiminde.
Qujat 16 naýryzǵa deıin kópshilik talqylaýda bolady. Kúntizbelik 10 kúnnen keıin kúshine enedi. Odan soń zańdy sheshimge sáıkes, ortalyq meshit janynda ornalasqan zıratta jerleýge ruqsat etilmeıdi.