Saryaǵash aýdanynda sharýalar bir jerden úsh ret ónim alady

SARYAǴASh. QazAqparat - Túrkistan oblysy, Saryaǵash aýdany, Jartytóbe aýyl okrýginde oblys ákimi Ómirzaq Shókeevtiń bir jerden úsh ret ónim alý tapsyrmasy oıdaǵydaı júzege asyp keledi, dep habarlaıdy QazAqparat Túrkistan oblysynyń Óńirlik kommýnıkatsııalar qyzmeti.

Munda qazirdiń ózinde jylyjaı kólemi 300 gektarǵa jetken. Sharýalardyń basym kópshiligi bir jerden úsh ret ónim alý isine beıim. Solardyń biri – «Shýhrat» sharýa qojalyǵy bıyl 70 sotyq jerge erte pisetin qyryqqabat egip, alqashqy shabyǵyn da bastap jiberipti.

«Bıyl aýa-raıy sharýalarǵa óte qolaıly bolyp tur. Sonyń arqasynda biz alǵashqy ónimimiz – qyryqqabatty qańtar aıynda otyrǵyzdyq. Bul daqylymyz mamyr aıynda pisse, artynsha bul jerge kartop egemiz. Kartopty jınap bola sala, kúzde plenka astyna askók otyrǵyzamyz», – deıdi qojalyq tóraǵasy Rozmat Melhozıev.

Aıta keteıik, búginde Jartytóbe aýyl okrýginde jalpy egistik kólemi 1600 gektardy quraıdy. Bul egistik alqaptarynda 997 sharýa qojalyq eńbek etedi. Dıqandardyń basym kópshiligi erte pisetin kókónis daqyldaryn ósirýmen aınalysady.

Naqtyraq aıtsaq, negizgi daqyl – qyryqqabat sanalady. Aǵyn sýdan esh tapshylyq joq. Osyndaı múmkindikterdiń arqasynda mundaǵy sharýalar bir jerden úsh ret ónim alýda.