«Sary» jáne «jasyl» aımaqtaǵy óńirlerde karantın jeńildetildi

NUR-SULTAN. QazAqparat – «Sary» jáne «jasyl» aımaqtaǵy óńirlerde karantın rejımi barynsha jumsartylǵanyna baılanysty monıtorıngilik toptardyń jumysy kúsheıtildi. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Sary» jáne «jasyl» aımaqtaǵy óńirlerde karantın rejımi barynsha jumsartylǵanyna baılanysty monıtorıngilik toptardyń jumysy kúsheıtildi. Degenmen shekteý sharalarynyń buzýshylyqtary azaıǵan joq. Osylaısha, aqpan aıynda qańtarmen salystyrǵanda reıdter sany 1,3 ese artty (16261-den 20663 reıdke deıin), al shekteý sharalary buzýshylyqtarynyń úlesi 3,6% qurady», - deıdi QR Densaýlyq saqtaý mınıstri Alekseı Tsoı.

Onyń aıtýynsha, jeke tulǵalarǵa salynǵan aıyppuldar sany 1,7 esege ósti (779-dan 1330 adamǵa deıin).

«Áleýmettik-ekonomıkalyq nysandardyń qyzmetine shekteý sharalaryn engizýdi jeńildetý, halyqtyń áleýmettik belsendiligin arttyrý koronavırýs ınfektsııasynyń taralý qaýpiniń artýyna ákelýi múmkin. Osyǵan baılanysty aımaq ákimderi men Іshki ister mınıstrliginen monıtorıngilik toptardyń jumysyn kúsheıtý jáne sharalar qabyldaý úshin sanıtarlyq-epıdemıologııalyq qyzmetke materıaldardy jiberýdi tapsyramyn», - deıdi ol.