Sársenbide Qazaqstannyń úsh aımaǵynda 2 gradýs úsik júredi
Soltústik batys antıtsıklon áserinen Qazaqstannyń basym bóliginde jaýyn-shashynsyz aýa raıy saqtalady.
Tek elimizdiń ońtústik-shyǵysynda ǵana atmosferalyq fronttardyń áserinen kúndiz jańbyr jaýyp, naızaǵaı jarqyldaıdy.
Respýblıka boıynsha keı jerlerde jel kúsheıip, túngi jáne tańǵy ýaqytta soltústikte, shyǵysta ortalyqta tuman túsedi.
Túnde elimizdiń soltústiginde, ortalyǵynda, shyǵysynda topyraq betinde 2 gradýsqa deıin úsik saqtalady.
Qyzylorda oblysynda, Túrkistan oblysynyń ońtústiginde, shyǵysynda, Batys Qazaqstan oblysynyń ońtústik-batysynda, Atyraý oblysynyń shyǵysynda, Abaı oblysynyń ońtústiginde tótenshe órt qaýpi saqtalady.
Kúndiz Atyraý oblysynyń basym bóliginde, Batys Qazaqstan oblysynyń ońtústik-batysynda aptap ystyq bolady.