Saryózekte abaısyzda oq tıgen áskerı qyzmetshini aýrýhanaǵa aparmaı, páterde ustaǵan

<p>SARYÓZEK. KAZINFORM — Jetisý oblysynyń Saryózek aýylynda 19 jastaǵy áskerı qyzmetshige oq tıip, aýrýhanaǵa tústi. Oqıǵa 2 qyrkúıek kúni bolǵan. Atalǵan fakt boıynsha qylmystyq is qozǵaldy.</p>

Oq tıip jaralanǵan áskerı qyzmetker — Temirbek Myńjasarov. 19 jastaǵy kishi serjant Saryózek garnızonyndaǵy áskerı bólimde jumys istegen.

Foto: Aıbek Quttybek/ Kazinform

Ol sol jerde otan aldyndaǵy boryshyn ótep, bir jyl buryn ǵana kelisimshartpen áskerı qyzmetke qabyldanypty. Qazir ol resmı eńbek demalysynda.

«2 qyrkúıek kúni qaýipsizdik sharalaryn saqtamaǵannan áskerı qyzmetshi jaraqat aldy. Qatelespesem ol dúısenbi me, seısenbi me eńbek demalysyna shyqqan. Tergeý amaldary júrip jatýyna baılanysty basqa aqparat bere almaımyn», -deıdi 12740 áskerı bólim komandıriniń tárbıe jáne ıdeologııalyq jumystar jónindegi orynbasary Nurǵalı Aqylbekov.

Fotoda Nurǵalı Aqylbekov. Sýretti túsirgen Kazinform tilshisi Aıbek Quttybek

Temirbek Myńjasarovtyń oń qoly jaralanypty. Oq onyń bilegin tesip ótken. Týystarynyń aıtýynsha, kishi serjantty áriptesi baıqaýsyzda atyp alǵan.

Alaıda, áskerı bólimdegiler ulymnyń jaraqat alǵanyna qaramastan aýrýhanaǵa aparmaı, páterde tyǵyp ustap otyrǵan deıdi Baqytbek Qasymbekov.

Fotoda Baqytbek Qasymbekov. Sýretti túsirgen Kazinform tilshisi Aıbek Quttybek

«Barǵan kezde balamdy áskerı tergeý basqarmasynyń jigitteriniń shtabynan taýyp otyrmyn, ol jigitter balamdy 3-úı, 3-páterden bireýdiń páterden taýyp alǵan. Balam taraqan qaptap júrgen, bomjdardyń mekenindeı jerde jatqan. Taraqannan basqa jeıtin eshteńe joq ol jerde, antısanıtarııa, eshqandaı tazalyq joq. Álsiregennen balam basyn kótere almaı tur. Áskerı tergeý basqarmasyndaǵylar taýyp bermegende balamnyń súıegin de tappaı qalatyn jaǵdaı bolyp tur eken», — deıdi áskerı qyzmetshiniń ákesi Baqytbek Qasymbekov.

Qazir Myńjasarov Eskeldi aýdandyq aýrýhanasynda em qabyldap jatyr. Ákesiniń aıtýynsha ol resmı túrde eńbek demalysynda ekeninen beıhabar. 

Eske sala keteıik, buǵan deıin Arys qalasynda tórt áskerı qyzmetshi jaralanǵanyn jazǵanbyz.