Saryaǵash qalasynda salynǵan 5 qabatty turǵyn úıde káriz júıesi qarastyrylmaǵan

<p>Bastapqy jobalaý-smetalyq qujattamasynda ınfraqurylym bolmaýynan jańa úıler 5 jyl boıy paıdalanýǵa berilmeı keldi. Bul týraly Sybaılas jemqorlyqqa qarsy is qımyl agenttiginiń Túrkistan oblysy boıynsha departamentiniń basshysy Murat Tóleýbaev málimdedi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Túrkistan oblysynda jyl basynan beri jemqorlyqqa qarsy 10 monıtorıng jumystary júrgizilgen. Atap aıtar bolsaq, qurylys, aýylsharýashylyǵyn sýbsıdııalaý, jer qoınaýyn paıdalaný, ataýly áleýmettik kómek kórsetý, memlekettik múlik, jylytý qazandyqtarynyń jumysy, sibir jarasy qabirlerine qoıylatyn talaptar, «Bızneske jol» jobasynyń júzege asyrylýy, «Aýyl amanaty» baǵdarlamasy boıynsha anyqtalǵan táýekelderdi joıý úshin 50 usynym berilgen. Qazirgi kezde onyń 19-y tolyq oryndalyp otyr. Sonymen qatar jer, bilim berý, densaýlyq saqtaý, aýylsharýashylyq, fıtosanıtarııa, turǵyn úı salalarynda sybaılas jemqorlyq táýekelderine syrtqy taldaý júrgizilip, 82 usynym engizilgen. 

«2018 jyldyń basynda Saryaǵash qalasynda 5 qabatty turǵyn úıdiń qurylysy bastalyp, 2019-2020 jyldary aıaqtalǵan bolatyn. Alaıda, bul úılerdiń bastapqy jobalaý-smetalyq qujattamasynda ınfraqurylym, ıaǵnı, káriz júıesi qarastyrylmaǵan. Sol sebepti, 5 jyldan astam ýaqyt kezekte turǵandarǵa úı berilmeı keldi. Oblys ákimdigimen birlesip júrgizgen jumystar nátıjesinde, qurylys jumystary tolyq aıaqtalyp, turǵyn úıge muqtaj 585 turǵyn jaldamaly páterge ıe boldy» - dedi Murat Tóleýbaev. 

Sondaı-aq spıker oblystyq sport jáne dene shynyqtyrý basqarmasy men oǵan baǵynysty mekemelerdiń qyzmetine sybaılas jemqorlyq táýekelderine syrtqy taldaý bastalǵanyn málimdedi. 

Taldaý aıasynda, sport túrleri men buqaralyq sportty damytý, sport klýbtary men federatsııalarǵa bólingen qarjyny paıdalaný, sportshylar men jattyqtyrýshylardyń sapaly quramy, olarǵa tólenetin eńbekaqy qory jáne basqa da máseleler qamtylady.