Sarhat Beısenova: COVID-19-dan qorǵaný - árkimniń sanaly tańdaýy

NUR-SULTAN. QazAqparat - Elordadaǵy epıdemıologııalyq jaǵdaı áli de shıelenise túsýde jáne shahar «qyzyl» aımaqta qalyp otyr. Bul týraly Nur-Sultan qalasynyń bas sanıtar dárigeri Sarhat Beısenova málim etti, dep habarlaıdy QazAqparat tilshisi.

«Elordada táýligine alǵashqy zerthanalyq rastalǵan 366 jaǵdaı tirkeldi. Onyń ishinde 270 jaǵdaı - sımptomdy, 96-sy - sımptomsyz. Sońǵy aptada 4 409 adam COVID-19 juqtyrǵan. Aldyńǵy aptamen salystyrǵanda (13 627 jaǵdaı) jaǵdaılardy tirkeý sany 3 ese azaıdy. KVI-men aýyrǵandardy barynsha anyqtaý maqsatynda qalada 24 zerthana jumys isteıdi. Onda táýligine 11 myńnan astam PTR zertteýler júrgiziledi», - dedi ol.

Bas sanıtar dárigerdiń málimetinshe, osy jyldyń basynan beri elordada 282 114 zertteý júrgizilip, onyń 83 351-i oń nátıje kórsetti.

«Omıkron» jańa shtamynyń basty ereksheligi- vırýstyń tez taralýy. Ol qalada anyqtalǵan sátten bastap, ıaǵnı qańtar aıynyń basynan 7 aqpanǵa deıin barlyǵy 83 067 jaǵdaı tirkeldi. Bul pandemııa kezindegi rekordtyq aılyq kórsetkish sanalady. Alaıda, patsıentterdi statsıonarlarǵa jatqyzý aıtarlyqtaı qalypty. Bul, eń aldymen, vaktsınatsııalanǵan turǵyndar men qaıta aýyryp shyqqan, ıaǵnı ımmýnıteti bar adamdar paıyzynyń kóptigine baılanysty. Qazir olar bul tolqynnan ońaı ótýde», - dedi Sarhat Beısenova.