Sarbazdy uryp óltirdi degen leıtenant 7 jylǵa sottaldy

<p>ALMATY. KAZINFORM &ndash; Almatyda sarbazdy uryp-soǵyp, ólýine ákelgen leıtenantqa úkim shyqty.</p>

Sottyń baspasóz qyzmeti habarlaǵandaı, sarbaz Dosymjan Sálimjannyń ólimine qatysty isti Almaty garnızony áskerı sotynyń sýdıasy N. Jeksembıev qarady.

Bul is boıynsha leıtenant Shákırov Qylmystyq kodekstiń 451-baby 2-bóligi boıynsha aıyptaldy.

«Sot J.Shákirovti «Bılikti asyra paıdalaný» baby boıynsha kináli dep tanylyp, 7 jylǵa bas bostandyǵynan aıyrdy. Jábirlenýshiniń paıdasyna 10 mln teńge kóleminde moraldyq zııan óndirildi», - delingen sot sheshiminde.

Úkim zańdy kúshine engen joq.

Aıta keteıik, 2023 jyldyń qazan aıynda Atyraý oblysy Qulsary qalasynan áskerge shaqyrylǵan Dosymjan Sálimjan boryshyn Jetisý oblysy Saryózek kentindegi №29108 áskerı bóliminde ótep júrgen. Bıyl mamyrda áskerı gospıtalge túsken jaýynger on kúnnen soń sonda kóz jumdy.

Osyǵan deıin, Joǵarǵy sot Qańtar oqıǵasy kezinde oqqa ushqan Aıkórkemniń isi boıynsha 7 jylǵa sottalǵan áskerı qyzmetker Arman Jumannyń isi boıynsha sheshim shyǵarǵany týraly jazǵan edik.