Sarbazdardy uryp-soqqan áskerı qyzmetshi jazadan qutylyp ketti

<p>AQTÓBE. KAZINFORM &ndash; Aqtóbe garnızonynyń áskerı sotynda Mańǵystaý oblysyndaǵy 25/744 áskerı bóliminiń qyzmetkeri N. Amralıevke qatysty qylmystyq is qaraldy. Ol sarbazdardy uryp-soqqany úshin sot aldynda jaýap bergenimen, jazadan qutylyp ketti.&nbsp;</p>

Aqtóbe garnızonynyń áskerı soty Qylmystyq kodekstiń «Bılikti asyra paıdalaný» baby boıynsha túsken isti ashyq qarady.

Іs materıalyna súıensek, 2024 jyldyń 25 naýryzy kúni saǵat 21:00-de áskerı sheni bar jáne oq atýmen qoldaý rotasynyń qyzmetkeri N. Amralıev óziniń ruqsatynsyz dálizde júrgeni úshin qatardaǵy jaýyngerlerge tıisedi. Onymen qoımaı, jatyn bólmege baryp, óz ókilettiligin asyra paıdalanyp, birneshe sarbazdy judyryǵymen urady. Sonymen birge 2024 jyldyń 29 naýryzy kúni shamamen saǵat 22:20-da oq atýmen qoldaý rotasynyń kantselıarııasynda qatardaǵy jaýyngerlerdi nasybaı atqany úshin jazalap, urady. «Bárimiz birimiz úshin, birimiz bárimiz úshin» dep keıbirin judyryqtaıdy, keıbirin alaqanymen salyp qalady.

Aǵa leınenant N. Amralıev qyzmettik ókilettiligin asyra paıdalanyp, 6 sarbazdy uryp-soqany úshin Qylmystyq kodekstiń 451 baby 1 bóligimen quqyqbuzýshylyq jasaǵan. Sot otyrysy kezinde sottalýshynyń qorǵaýshysy N. Amralıev kinásin moıyndaǵanyn, alaıda taraptar ózara tatýlasqanyn aıtty. 

– Sot Qylmystyq kodekstiń «Tatýlasýǵa baılanysty qylmystyq jaýaptylyqtan bosatý» baby, Qylmystyq-protsestik kodekstiń 35 baby 1 bóligi 12 tarmaǵyna súıenip Qylmystyq kodekstiń 451 baby 1 bóliginde qarastyrylǵan qylmystyq jaýapkershilikten bosatty, - dep jazylǵan sot kabınetinde.

Eske salsaq, Qııaly shekara zastavasynda áriptesin atyp, qamaýǵa alynǵan áskerı qyzmetshi sottaldy. Sot ony 3 jylǵa bas bostandyǵynan aıyrdy.