Sarbazdar ómiri, «Tamasha», jańa serıaldar — Jibek Joly jańa maýsymda ne kórsetedi
QR Prezıdentiniń keńesshisi — Prezıdenttiń baspasóz hatshysy Berik Ýálı Prezıdenttiń kez kelgen memlekettik, resmı saparlaryn vıdeo jaǵynan, tehnıkalyq jaǵynan qamtamasyz etip, halyqqa jetkizetin — Prezıdent teleradıokesheni ekenin atap ótti.
«Prezıdenttiń baspasóz qyzmeti tikeleı Prezıdent teleradıokeshenimen tyǵyz qarym-qatynasta jumys isteıdi. Sońǵy eki jylda teleradıokeshen keńeıip, Jibek Joly, Silk Way, Silk Way Cinema telearnalarymen, Kazinform halyqaralyq aqparat agenttigimen tolyqty. Kúz bastalysymen kórermen qaýym elimizdegi telearnalar jańa maýsymǵa qandaı daıyndyqpen keldi degen úlken suraq qoıatyny ras. Al respýblıkalyq telearnalar ózderiniń shyǵarmashylyq básekesinde ártúrli baǵdarlamalaryn kórermen nazaryna usynady. Jaqsy baǵdarlamalar ómirsheń bolady, kórermenniń kózaıymyna aınalady. Búgin Jibek Joly telearnasynyń kóptegen qyzyqty jobalary, realıtı-shoýlary, teleserıaldary, 45 jyl buryn tamashany jańǵyrtqany, tarıhı-derekti fılmderge nazar aýdarýy bárimizdi qýantyp otyr. 300-ge jýyq qyzmetkerdiń basyn qosqan shyǵarmashylyq toptan jańa maýsymda kúterimiz kóp», — dedi Berik Ýálı jańa maýsym tanystyrylymynda.
Jańa maýsymnyń jańa jobalary qatarynda tanymal akter Berik Aıtjanov júrgizetin «100 sarbaz» jobasy bar.
Realıtı-jobada áskerı mindetti ár qurylymnan qurylǵan 10 komanda, ıaǵnı 100 sarbaz qatysyp, erik, jiger jáne qaıratty pash etetin túrli synaqtan ótedi.
Al synnan súrinbeı ótken sarbazdar — elimizdiń eń rýhty jigitteri atanbaq.
«Biraq búginginiń eri naızamen synalmaıdy. Kúsh, qaırat, jiger bilekte ǵana emes, júrekte bolǵany abzal. Kúshińdi álsizge jumsaý aqymaqtyq, eliń úshin jumyldyrý — abyroı. Biz ekinshisin tańdaımyz», — dedi baǵdarlama júrgizýshisi Berik Aıtjanov.
16 qyrkúıekten bastap, arna efırinde «111 Juz on bir» telehıkaıasynyń premerasy bolady. Bul detektıvtik drama janryndaǵy 40 serııaly fılm. Sıýjet áıelderdi zorlyq-zombylyqtan qorǵaý bólimshesi qyzmetkerleriniń kúndelikti ómirin kórsetedi.
«111 — otbasy, áıelder jáne balalarǵa kómek kórsetý qyzmetiniń baılanys nómiri. 2021 jyly Prezıdent polıtsııa bólimderinde áıel tergeýshilerden jedel toptar qurýdy tapsyrdy. Al 2023 jyly Qaraǵandyda alǵashqy áıelder polıtsııasy bólimshesi ashyldy. Bul detektıvti drama 4 túrli áıeldiń áıelder men balalarǵa jasalǵan qylmysqa qarsy kúres bólimshesindegi qyzmetin kórsetedi», — dedi basty róldi somdaǵan aktrısa Aınur Bermuhambetova.
Jańa maýsymda «Jibek Joly» telearnasynyń kórermenderine aty ańyzǵa aınalǵan «Tamasha» ázil-syqaq teatrynyń tanymal nómirleri men akterleriniń sahna syrtyndaǵy ómiri týraly serıal usynylady. Bıyl «Tamasha» telebaǵdarlamasynyń efırge shyqqanyna 45 jyl. On serııaly telehıkaıa shyǵarmashylyq ujymnyń qurylý tarıhy men qalyptasý jolyn kórsetedi.
Al teatr sahnasynda óner kórsetken Qudaıbergen Sultanbaev, Tuńǵyshbaı Jamanqulov, Lıdııa Kádenova, Meıirman Nurekeev, Toqsyn Qulybekov, Ýaıs Sultanǵazınder obrazdaryn serıaldan qaıta kórýge bolady.
Arnanyń úshinshi tól telehıkaıasy — «Darhan batyr» biraz jalqaý jigitti dıvannan turǵyzyp, eńbekke jeteleýi múmkin. Sondaı-aq, «Qazaqfılmniń» altyn qory men otandyq rejısserlerdiń kórkem jáne derekti fılmderi, otandyq telearnalar túsirgen telehıkaıalar shetel kórermenine arnalǵan «Silk Way Sinema» telarnasynda jalǵasyn tabady.
Jańa maýsymda «Ýáde» baǵdarlamasynda júrgizýshi Erbolat Muhamedjan úkimet músheleri men ákimderdiń Memleket basshysyna bergen ýádelerin taǵy suraıdy.
Al «Taza qala» telejobasynda túsirilim toby Qazaqstannyń iri jáne shaǵyn qalalaryna baryp, tazalyǵy men kórki týraly áńgimeleıdi. Jýrnalıster jergilikti turǵyndarmen kezdesedi, kommýnaldyq qyzmetterdiń jumysyn kóredi, aımaqtyń ekologııalyq ómirine belsendi qatysatyn barlyq eriktilermen tanysady.
Al arnanyń eń tanymal júrgizýshisi Nurlan Qoıanbaevtyń jobasy «Jańa Túngi stýdııa. 16 qyz» degen ataýmen kúzgi maýsymyn bastady. Baǵdarlama 50 mınýt boıy qazaqstandyqtardy kıno, mýzyka, medıa jáne saıasat áleminiń qyzyqty qonaqtarymen tanystyrady.
«Jaqsy adamdarym» benefıs-shoýynda jyl saıyn eńbegimen elge tanylǵan jandar jınalyp, «Jaqsy adam» marapaty júrgiziledi. Al bıylǵy «Jaqsy adam -2024» júldesinde óz qalasyn, óz óńirin, óz aýlasyn tazalyqta ustap, týǵan jeriniń gúldenýine úles qosyp jatqan qarapaıym el turǵyndary marapattalady.
«Jańa ýaqyt» jáne «Novoe vremıa» jańalyqtary kún saıyn eldegi jańalyqtarǵa saraptama men sholý jasaıdy. «Májilis Laıv» jobasynda halyq úshin eń mańyzdy máseleler talqylanatyn Parlament jumysyn tamashalaýǵa bolady.
Telearnada eki jyl boıy el tarıhynda orny bólek, eńbegi orasan tulǵalarǵa arnalǵan derekti kórkem fılmder toptamasy shyǵyp keledi.
Maııa Bekbaevanyń avtorlyǵymen shyǵatyn «Nasha ıstorııa» jobasy bıyl Ábilhan Qasteev, Sanjar Asfendııarov, Álkeı Marǵulan, Aleksandr Zataevıchterdiń ómirine arnalady. Al bul toptaǵy shoqtyǵy bıik joba — qazir túsirilim jumystary bastalyp jatqan «Joshy han» derekti fılmi.
Al Silk Way arnasynda «Reporter with President», «New time», «Faces of Science», «Travel and comfort», «Taste Kazakhstan» jáne «Orel ı reshka. Kazahı» jobalary jalǵasady.
«Bizdiń qaǵıdamyz — ádildik, tiregimiz — jaýapkershilik, maqsatymyz — órleý. Bul Prezıdentimiz Qasym-Jomart Toqaevtyń ulttyq quryltaıda aıtqan sózi, bul sózder bizdiń telearnanyń negizgi qundylyǵy. Búgin sizderge usynatyn barlyq ónimniń astarynda osy oılar jatyr. Osy maýsym biz úshin erekshe. Óıtkeni ashylǵanymyzǵa nebári 2 jyl bolsa da, biz iri jobalarǵa, úlken formattarǵa daıyn ekenimizdi aıtqymyz keledi. Kórermenimizdi kún saıyn tól kontentpen, otandyq kontentpen qyzyqtyrý kerek, áıtpese olar ózgeniń jeteginde ketedi. Sondyqtan memlekettik sana úshin, saýatty, azamattyq qoǵam úshin jáne otandyq naryqta oıyp turyp oryn alady degen oıymyzben búgin biraz jobalarymyzdy usynǵymyz keledi. Biz áli qorytyndy jasamaımyz, usynatyn dúnıemiz óte kóp, al olardyń baǵasy jáne qoǵamǵa jetýi sizderden», — dedi Jibek Joly telearnasynyń dırektory Erkejan Kúntýǵan.
Aıta keteıik, «Jibek Joly» telearnasy Qazaqstan Respýblıkasy Prezıdentiniń teleradıokesheni medıakompanııasynyń quramynda. 2022 jyldyń 1 qyrkúıeginde efırge shyqqan telearna az ýaqyttyń ishinde kósh bastaǵan otandyq arnalardyń qatarynan tabyldy.