Sarbazdar men Bas áskerı klınıkalyq gospıtaldiń qyzmetkerlerin Jańa jylmen quttyqtady

<p><strong>Astanada QR Qorǵanys mınıstrligi Tárbıe jáne ıdeologııalyq jumystar departamentiniń bastyǵy ádilet polkovnıgi Tileýhan Basqojaev Bas áskerı klınıkalyq gospıtalǵa bardy. Ol emdelip jatqan sarbazdarǵa qorǵanys vedomstvosy basshysynyń atynan jańa jyldyq syılyqtar tabys etti, dep habarlaıdy Kazinform.&nbsp;</strong></p>

– Biz qorǵanys mınıstri general-polkovnık Rýslan Jaqsylyqovtyń atynan merekemen quttyqtap kelip otyrmyz. Qyzmetkerlerdiń eńbegine tabys tileımiz jáne jańa jylda arman-maqsattary oryndalsyn. Ujymdardaǵy moraldyq kóńil-kúıdi zerdelep, eńbek jaǵdaılarymen tanysý sekildi jumystar Qarýly kúshterde únemi, barlyq deńgeıde ári barlyq garnızondarda júrgizilip keledi. Árbir jaýynger men qyzmetker nazar aýdarýǵa laıyq. Bas áskerı klınıkalyq gospıtal mamandaryna janqııarlyq eńbegi úshin erekshe alǵys aıtamyz, - dedi ol.

Ádilet polkovnıgi Tileýhan Basqojaev gospıtaldiń nevrologııalyq bólimshesinde emdelip jatqan merzimdi qyzmet sarbazdaryna baryp, zamanaýı palatalardy aralap, jaýyngerlermen sóılesti. Em alýshylarǵa Qorǵanys mınıstriniń atynan jańa jyldyq syılyqtar tabys etti.

Sarbazdardyń kóńil-kúıimen tanysyp, gospıtaldiń ashanasynda tamaqtaný sapasy týraly surap bildi. Ádilet polkovnıgi Tileýhan Basqojaevtyń «Qarýly kúshter qatarynda qyzmetin jalǵastyrǵysy keletinder bar ma?» degen suraǵyna jınalǵandardyń teń jartysy oń jaýap berdi.

Biri mamandyǵy boıynsha qyzmetin jalǵastyrýdy josparlap otyrsa, endi biri áskerı oqý ornyna túsýdi oılaıdy. Jańa jylǵa oraı Tileýhan Basqojaev sarbazdarǵa týystarymen telefon arqyly sóılesip, jaqyndaryn kele jatqan merekemen quttyqtaýǵa múmkindik berýdi tapsyrdy.

Aıta keteıik, qorǵanys vedomstvosynyń áskerı-medıtsınalyq qyzmet júıesindegi jetekshi klınıkada jyl saıyn úsh myńǵa jýyq patsıent statsıonarlyq emdeýden ótedi. Olarǵa bazalyq medıtsınalyq qyzmetten bastap kúrdeli operatsııalarǵa deıingi mamandandyrylǵan medıtsınalyq kómek kórsetiledi. Aýrýhananyń patsıentteri – kýrsanttar men merzimdi qyzmet sarbazdary, ofıtserler quram men kelisimshart boıynsha áskerı qyzmetshiler jáne olardyń otbasy músheleri.

Nevrologııalyq bólimsheniń bastyǵy medıtsına qyzmetiniń podpolkovnıgi Qanat Sekerbaevtyń aıtýynsha, bólimshe jıyrma adamǵa eseptelgen. Munda olar tek emdeýmen ǵana emes, sonymen qatar saraptamalyq jumystarmen de aınalysyp, patsıentterdiń áskerı qyzmetti jalǵastyrýǵa jaramdylyǵyn zerdeleıdi.

Jedel nevrologııalyq aýrýlary bar naýqas qabyldaý bólimine túsken kezde jedel kómek kórsetiletin jaǵdaılar da kezdesedi. Naýqasty gospıtalge jatqyzýǵa nemese qajetti kómek kórsetýge bolady. MÁMS baǵdarlamasy aıasynda bólimshede azamattyq tulǵalar da emdelip jatyr.