Saraıshyq qalasynyń ornynan Qasym han saraıynyń tabylýy yqtımal

ATYRAÝ. QazAqparat - Atyraý oblysy Mahambet aýdanynyń Saraıshyq aýylyndaǵy kóne qalanyń orny qaıta qazyla bastady, arheologtar Qasym hannyń saraıyn tabýdan úmitti, dep habarlaıdy «QazAqparat» HAA tilshisi.

«Uzaq jyldar boıy kóne qala ornynyń aýmaǵy jyl ótken saıyn birneshe metrge qysqaryp keledi. Óıtkeni, qıraǵan úıindilerdi  Oral ózeni shaıyp áketken. Bıylǵy jyly jaǵajaıdy bekitý jumystar júrgizilgen. Biraq, kóne qala aýmaǵynyń basym bóligi sý astynda qalyp, tek 20 paıyzy ǵana qurǵaq jerde saqtalǵan. 

Alaıda, taıaýda Máskeýden Saraıshyq qalasy engizilgen 18 ǵasyrdaǵy karta tabyldy. Kartadan qalanyń eń baı bólikteri basqa jaǵynda ornalasqandyǵy anyqtaldy. Olardyń qatarynda bul jerdi basqarǵan Qasym hannyń saraıy da bar. Biz saraı ornalasqan jerdi tabýǵa tyrysyp jatyrmyz», - deıdi arheolog Marat Qasenov.

Aıta keteıik, bir kezderi Uly Jibek jolynyń boıynda ornalasqan kóne Saraıshyq qalasynyń orny «Qazaqstannyń kıeli jerleriniń geografııasyna» engizilgen.