Saraıshyq – tól shejiremizde aıryqsha orny bar kıeli shahar – Qasym-Jomart Toqaev
«Eń aldymen, men barshańyzǵa Amal kúni qutty bolsyn degim keledi. Qystan aman-esen shyqqan týǵan-týys, aǵaıyn bir-birimen qaýyshyp jatyr. El arasynda Amal kúni elimizdiń batys aımaǵyna tán mereke degen túsinik bar. Biraq bul qazaqtyń kóneden kele jatqan dástúri ekenin umytpaýymyz kerek. Sondyqtan biz tutas el bolyp, Naýryz meıramyn osy kúnnen, ıaǵnı Amal kúninen bastap toılaǵanymyz jarasymdy bolary sózsiz,-dedi Prezıdent.
Memleket basshysy sózinde bıyl Ulystyń uly kúni qasıetti Oraza aıynyń alǵashqy kúnderimen tuspa-tus kelip otyrǵanyn atap ótti.
Ulttyq Quryltaı da Áz Naýryz qarsańynda ótip jatyr. Ulystyń uly kúni tabıǵat pen tutas tirshilik jańarady. Al Quryltaıda qoǵamdyq qundylyqtardy jańǵyrtý úshin mańyzdy qadamdar jasalady. Jańarý men jańǵyrý jaqsylyqqa jol ashady. Sondyqtan Quryltaı músheleriniń jylyna bir ret alqaly jıynda bas qosýy ıgi dástúrge aınaldy.
«Alǵashqy otyrys Ult uıasy Ulytaý jerinde ótse, byltyr kıeli Túrkistanda jınaldyq. Búgin taǵy bir tarıhı ólke – Atyraý oblysyna kelip otyrmyz. Úshinshi otyrystyń Jaıyq jaǵasynda ótip jatqany tegin emes. Áıgili Saraıshyq qalasy osy jerge tıip tur. Bul shahar Ulyq ulystyń, keıin Qazaq handyǵynyń mańyzdy ákimshilik jáne saýda ortalyǵy bolǵany tarıhtan belgili»,-dedi Memleket basshysy.
Sondaı-aq Prezıdent «Uly Jibek Jolynyń boıynda turǵan qala bir kezderi aıryqsha geostrategııalyq ról atqarǵanyn atap ótti.
Batys pen Shyǵystyń ekonomıkalyq, saıası, mádenı qarym-qatynasyna erekshe yqpal etken. Ataqty handarymyz osy jerge ordasyn tigip, el bılegen. Birqatary Saraıshyqta máńgilik mekenin tapqan. Tarıhshylardyń paıymdaýynsha, Qazaq handyǵyn qýatty memleketke aınaldyrǵan Qasym han osynda jerlengen. Bir sózben aıtsaq, Saraıshyq – tól shejiremizde aıryqsha orny bar kıeli shahar.
«Biz eldigimizdiń negizin qalap, ony urpaqqa tabystaǵan babalar rýhyna taǵzym etemiz. Alaıda, ótkenimen ǵana ómir súretin jurt órkenıetti el bola almaıdy. Ult sapasyn jaqsartamyz desek, bir el bolyp jańa qundylyqtar júıesin qalyptastyrýymyz qajet. Quryltaı – eshqashan toı toılap, áńgime-dúken quratyn jıyn bolǵan emes, keleshekte de ondaı bolmaıdy. Aldyńǵy eki otyrysta elimizdi damytýǵa qatysty mańyzdy bastamalar kóterildi. Onyń birazy oryndaldy. Jalpy ózgerister barlyq salada bolyp jatyr»,-dedi Prezıdent.