Saraıshyq qalashyǵynan adam súıekteri men kúmis monetalar tabyldy

<p>Atyraý oblysyndaǵy Saraıshyq qalashyǵynyń ornynda arheologııalyq qazba jumysy jalǵasyp jatyr. Jaqynda ortaǵasyrlyq tarıhı qalashyqtyń ornynan adam súıekteri, kúmis, qola monetalar men basqa da túrli jádiger tabyldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Atyraý oblystyq tarıhı-ólketaný mýzeıiniń ekspedıtsııa toby Saraıshyq qalashyǵynyń ornynda arheologııalyq qazba jumysyn 4 qyrkúıekte bastaǵan.

Osy kezge deıin 3 myń sharshy metr aýmaqtyqtyń ústingi bóligi ashylǵan.

«Qazba kezinde kóptegen kórhana anyqtaldy. Kúıdirilgen kirpishten turǵyzylǵan kórhanalardyń kólemi — 2,5-3 metr. Onyń bıiktigi 3-ten 12 qabatqa deıin saqtalǵan. Kórhanalar tazartylyp, 2-shi jáne 8-jerleý ornynan tabylǵan adam súıekterine antropologııalyq zertteý jumystary bastaldy. Adam súıekterine antropologııalyq zertteýdi Á. Marǵulan atyndaǵy arheologııa ınstıtýty fızıkalyq antropologııa zerthanasynyń meńgerýshisi R. Januzaq júrgizip jatyr» dep habarlady atalǵan mýzeıden.

Munda ortaǵasyrlyq úılerdiń orny anyqtalǵan. Qazir 1200 sharshy metr aýmaǵy tazartylǵan.

Ortaǵasyrlyq 10-ǵa jýyq turǵyn úıdiń bólmelerinde pesh, tandyr orny, sýfa (yspa) oryndary saqtalǵan.

«Qazba jumystary kezinde orta ǵasyrǵa jatatyn 100-ge kúmis, 50-ge jýyq mys moneta tabyldy. Qyshtan jasalǵan qumyra, sháınek, kóze, túbek, ydys qaqpaqtary, birneshe syrly ydystyń bólikteri, sharýashylyq maqsatta qoldanylǵan shyraǵdan túrleri, qubyr, shyǵyr, sferakonýs, aý batyrmalary, urshyq basy, súıekten jasalǵan shúmek, asyq tabylyp otyr. Qola aına men onyń bólikteri, shynydan jasalǵan monshaq túrleri de bar» deıdi mýzeı qyzmetkerleri.

Eske sala ketelik, budan buryn Atyraý oblysynda ejelgi qorǵannan altynnan jasalǵan áshekeıler tabylǵanyn habarlaǵan edik.