Saraptamaǵa jiberiletin oqýlyqtardyń avtory tolyǵymen jasyryn bolady
«Oqýlyq avtorlaryn oqytý aıasynda ǵylymı termınologııany qoldanýdyń biryńǵaı tásilin paıdalanýǵa erekshe kóńil bólinedi. Búgingi kúni Mádenıet jáne sport mınıstrligi janynan termınologııalyq jumys toby quryldy, ol latyn álipbıine kóshý kezinde termınologııalyq qordy rettep, termınologııalyq erejelerdi qalyptastyrý boıynsha jumys júrgizetin bolady. Osyǵan baılanysty Bilim jáne ǵylym mınıstrligi oqýlyqtardy ázirleý kezinde termınologııany paıdalaný boıynsha usynystardy pysyqtaýda», - dedi Premer-Mınıstr.
Asqar Mamınniń atap ótinshe, Oqýlyqtardy daıyndaý jáne saraptama ótkizý jónindegi jumysty uıymdastyrý qaǵıdasynda úzdik álemdik tájirıbeni eskere otyryp, oqýlyqtarǵa saraptama ótkizý jáne olardy irikteý rásimine, sarapshylardyń biliktilik deńgeıine qoıylatyn talaptar qatańdatyldy. Oqýlyqtar men oqý-ádistemelik keshenderdiń ǵylymı jáne pedagogıkalyq saraptamasyn sarapshylardyń avtomattandyrylǵan derekter bazasyna engizilgen jáne konkýrstyq irikteýden ótken ǵalymdar men pedagogtar qatarynan qalyptastyrylatyn saraptama komıssııasy júrgizedi.
«Saraptamany ótkizý qupııalylyq rejımine aýystyryldy, ıaǵnı saraptamaǵa jiberiletin oqýlyqtardyń avtorlary tolyǵymen jasyryn bolady. Bul shara saraptamanyń obektıvtiligi men sarapshylardyń beıtaraptyǵyn qamtamasyz etýge baǵyttalǵan. Sondaı-aq qaǵıdada oqýlyqtardy mindetti túrde synaqtan ótkizý qarastyrylǵan», -dedi ol.
Onyń atap ótýinshe, jurtshylyqtyń barlyq eskertýleri men usynystary oqýlyqtardy ázirleý men saraptama ótkizýdi normatıvtik qamtamasyz etýdi jetildirý úshin qurylǵan qoǵamdyq-saraptamalyq ashyq alańda talqylanatyn bolady.
«Budan basqa, «Orta bilim berýdi jańǵyrtý» jobasy aıasynda oqýlyqtardyń sapasyn arttyrý maqsatynda Dúnıejúzilik bank qarajaty esebinen árbir jeke pán boıynsha oqýlyqtarǵa qoıylatyn talaptardy jańartý, olardy baǵalaý ádistemesi men krıterıılerin jetildirý kózdelgen. Eki myń sarapshy men 40 jattyqtyrýshyny oqytý josparlanýda», - deıdi Asqar Mamın.