Saraptama jumystary jas mamandardy qoldaýǵa arnalǵan memlekettik baǵdarlamalardyń tıimdiligin arttyrý qajettigin kórsetti ­- QR Parlamenti Májilisiniń depýtaty M. Begentaev

ASTANA. 2 qazan. QazAqparat - Búgin Astanadaǵy «Nur Otan» HDP Ortalyq apparatynda «Jas mamannyń mártebesin quqyqtyq aıqyndaý, onyń eń tómengi áleýmettik paketi» taqyrybynda dóńgelek ústel otyrysy bolyp ótti.

Sharanyń maqsaty jas mamannyń mártebesin quqyqtyq aıqyndaý jáne onyń eń tómengi áleýmettik paketi jónindegi máseleler boıynsha memlekettik organdar men azamattyq sektor arasyndaǵy ortaq ustanymdy qalyptastyrý bolyp tabylady.

Memleket basshysy Nursultan Nazarbaevtyń «Jalpyǵa Ortaq Eńbek Qoǵamyna qaraı 20 qadam» atty  maqalasyndaǵy jáne Qazaqstan Halqy Assambleıasynyń 19 sessııasyndaǵy bergen tapsyrmalary aıasynda jas mamannyń quqyqtyq mártebesin jáne onyń eń tómengi áleýmettik paketin aıqyndaý qajet.

Bul týraly QR Parlamenti májilisiniń depýtaty Meıram Begentaev aıtty.

«Búginde jastardyń áleýmettik máselelerin sheshýge baǵyttalǵan «Dıplommen aýylǵa!», «Shaǵyn jáne monoqalalardy damytý», «Jumyspen qamtý - 2020», «Qoljetimdi baspana - 2020» sııaqty birqatar baǵdarlamalar bar. Olardyń barlyǵy da jastardyń áleýmettik máselelerin sheship, bolashaqqa degen senimin kúsheıtýge zor úlesin qosyp jatyr», - dedi ol.

«Degenmen, saraptama jumystary jas mamandardy qoldaýǵa arnalǵan baǵarlamalardyń tıimdiligin áli de bolsa arttyra túsý kerektigin kórsetip otyr», - dep túıindedi óz sózin M.Begentaev.

Sharany «Nur Otan» Halyqtyq Demokratııalyq partııasynyń «Jas Otan» Jastar qanaty men Qazaqstan Respýblıkasynyń Bilim jáne ǵylym mınıstrligi uıymdastyrdy.

Dóńgelek ústel jumysyna Qazaqstan Respýblıkasy Parlamenti Májilisiniń depýtattary, ortalyq memlelekettik organdardyń vıtse-mınıstrleri men agenttik tóraǵalarynyń orynbasarlary, respýblıkalyq kásipodaqtardyń jáne respýblıkalyq jastar uıymdardyń jetekshileri qatysty.

Otyrys barysynda «Memlekettik jastar saıasaty týraly» QR Zańyna jas mamannyń mártebesin quqyqtyq aıqyndaý, onyń eń tómengi áleýmettik paketi jáne basqa da suraqtar boıynsha ózgerister men tolyqtyrýlar engizý týraly máseleler talqylandy.

Otyrystyń qorytyndysy boıynsha «Memlekettik jastar saıasaty týraly» QR Zańyn jetildirýge baǵyttalǵan usynymdamalar qabyldandy.