Sarapshylardyń 75%-ǵa jýyǵy «Bolashaq» túlekteri Qazaqstannyń ekonomıkalyq damýyna úles qosady dep sanaıdy
Zertteýdi «Nur Otan» partııasynyń Qoǵamdyq saıasat ınstıtýty júrgizgen bolatyn. Al onyń qorytyndysyn jýrnalıster aldynda ınstıtýt basshysy Nurbek Saıasat shyǵardy.
«Bolashaq» baǵdarlamasynyń túlekteri ózderine qoıylǵan údeden shyǵa almady, Qazaqstan ekonomıkasyna salǵan úlesteri mardymsyz dep esepteıtinder kóp. Stıpendıattardyń shyǵarǵan ónimderi, mamandyrylǵan kompanııalary, serpindi jobalary, patentteri, ǵylymı jańalyqtary áli kúnge deıin joq degen ýáj aıtady. Oǵan sebep, stıpendıattardyń negizgi bóligi 30 jasqa deıingi jas mamandar. Kásibı eńbek jolyn endi-endi bastap jatyr. Olardan bas aınaldyrar tehnologııalar, serpindi bıznes ıdeıalardy kútý durys emes. Saýalnamaǵa qatysqan sarapshylardyń 75%-ǵa jýyǵy baǵdarlama túlekteri Qazaqstan Respýblıkasynyń ekonomıkalyq damýyna úles qosady dep sanaıdy. Al túlekterdiń 85%-dan astamy Qazaqstannyń damýyna aıtarlyqtaı úles qosyp otyrmyz dep esepteıdi.
Onyń atap kórsetkenindeı, zertteýge tartylǵan 100-ge tarta jumys berýshi de dál osyndaı pikirde kórinedi. Zertteýde belgili bolǵanyndaı, 97,6% túlek «Bolashaq» baǵdarlamasy alǵa qoıǵan maqsat pen negizgi mıssııanyń údesine saı keledi dep esepteıdi, 97%-dan astamy ózderiniń shet elde bilim alǵany úmitti aqtady dep sanaıdy.