Sarapshylar jańa Ekologııa kodeksine qatysty pikir bildirdi

ALMATY. QazAqparat - Bıyl qabyldanǵan Ekologııa kodeksi burynǵy qujattardan ózgerek. Qazir qorshaǵan ortaǵa qatysty ózekti problemalar az emes. Aýany lastaıtyn kásiporyndar syndy máseleler jetkilikti. Osyndaı túıtkilderdi retteýge jańa kodeks kómektesedi. Sarapshylar osyndaı pikir bildirdi, dep habarlaıdy QazAqparat tilshisi.

Alǵashqy Ekologııalyq kodeks 2007 jyly qabyldanyp, 2018 jylǵa deıin eldiń Ekologııalyq kodeksine shamamen 160 túzetý engizildi.

Praktıkalyq ekologtar qaýymdastyǵynyń tóraǵasy Laýra Málikovanyń aıtýynsha, burynǵy Ekologııalyq kodekstegi keıbir normalar bir-birine qaıshy kelgen.

ıAǵnı, Ekologııalyq kodeks tujyrymdamasy qoǵam talaptaryna sáıkes bolmady.

«Jańa kodeks jobasyn ázirleý 2018 jyldan bastaldy. Biz praktık ekologtardyń qaýymdastyǵy retinde buǵan belsene atsalystyq. 30-ǵa jýyq usynys jasadyq. Onyń birazy qabyldandy. Atap aıtar bolsam, esep berýdi ońtaılandyrý, jer ýchaskelerin bólý mehanızmin qaıta qaraý jáne osy mehanızmdi memlekettik ekologııalyq saraptamanyń qorytyndysymen baılanystyrý. Bul qujat burynǵy qujattardan ózgerek. Jańa qujatqa sáıkes, endi iri kásiporyndar jasyl tehnologııany engizýge midetti. «Lastaýshy tóleıdi jáne qalpyna keltiredi» qaǵıdatynyń negizinde lastanýdy boldyrmaý jáne baqylaý boıynsha sharalar, sondaı-aq qorshaǵan ortaǵa keltirilgen zııannyń ornyn toltyrý úshin jaýapkershilik kózdelgen. Ekologııalyq zııan oryn alǵan jaǵdaıda tabıǵat paıdalanýshy qorshaǵan ortany onyń bastapqy qalypyna keltirýge midetti», - deıdi sarapshy.

Sonymen qatar, ekolog ákimshilik kodekstiń aıasynda salyq kodeksine de ózgerister engizilgenin aıtty.

«Qorshaǵan ortany lastaǵandarǵa salynatyn aıyppul on ese artty. Sonymen qatar, buryn kásiporyndardy prokýratýranyń ruqsatymen ǵana tekseretin bolsa, endi aýany lastaǵan kásiporyndardy buqaralyq aqparat quraldarynda jarııalanǵan maqala negizinde jáne qoǵamdyq uıymnyń shaǵymy boıynsha teksere alady. Bul ókiletti memlekettik organdarǵa qorshaǵan ortaǵa zalaldy toqtatýǵa jáne shuǵyl áreket etýge múmkindik beredi. Sondaı-aq, ınspektorlardyń jumysyna degen halyqtyń senimin arttyrady»,- deıdi Laýra Málikova.

Ekobelsendi Tımýr Eleýsizovtiń sózinshe, jańa ekologııalyq kodeks qorshaǵan ortany qalpyna keltirýge, lastaýshylardan tazalyqty talap etýge jáne jaýapkershilikti kúsheıtý arqyly quqyq buzý faktileriniń aldyn alýǵa baǵyttalǵan.

«Jalpy, ekologııalyq kodekske ózgerister engizilgeni jaqsy boldy. Bul qujat arqyly kóptegen halyqaralyq kelisimderge jaqyndadyq»,-deıdi Tımýr Eleýsizov.

Ulttyq kásibı ekologııalyq aýdıtorlar palatasynyń prezıdenti Mıras Baıseıitovtyń pikirinshe, qabyldanǵan jańa ekologııalyq kodeks áli de jetildirýdi qajet etedi.

«Ekologııalyq aýdıttiń kodeksten alynyp tastalýy senimdi ekologııalyq aqparattyń joǵalýyna ákelýi múmkin. Mysaly, eski nusqada mindetti ekologııalyq aýdıt degen uǵym bolǵan. Endi zańdy aýdıt tujyrymdamasy alynyp tastaldy. Osylaısha, biz barlyq kásiporyndar men tabıǵı resýrstardy paıdalanýshylarǵa nemese jaı ónerkásiptik kásiporyndarǵa memlekettik baqylaýdy joǵalttyq. Mindetti ekologııalyq aýdıt júrgizgen kezde ekologııalyq aýdıtor ekologııalyq esep jasap, keıin ekologııa komıtetine jiberetin.Qazir ekologııalyq aýdıtorlardyń sany kúrt tómendedi. Ekologııalyq aýdıtorlyq uıymdar mamandardy qysqartýǵa májbúr bolady, osylaısha jumyssyzdyq oryn alady. Jańa qujatta erikti aýdıt uǵymy engizildi. Men kásipkerler ekologııalyq aýdıtke óz erkimen júginedi dep oılamaımyn. ıAǵnı, biz senimdi ekologııalyq aqparat ala almaı qalamyz. Jańa ekologııalyq kodeksti ázirleý úshin, meniń oıymsha, kem degende 2-3 jyl qajet. Sondyqtan jańa ekologııalyq kodeksti áli de jetildirý kerek»,- dedi Mıras Baıseıitov.

Eske salaıyq, 2 qańtar kúni Memleket basshysy Qasym-Jomart Toqaev QR Ekologııa kodeksine qol qoıdy.