Sarapshylar men saıasattanýshylar «Nur Otan»-nyń saılaýaldy baǵdarlamasyn talqylady
Olardyń arasynda Qazaqstan strategııalyq zertteýler ınstıtýtynyń dırektory Zarema Sháýkenova, Ekonomıkalyq zertteýler ınstıtýtynyń tóraǵasy Rýslan Sultanov, saıasattanýshylar Aıdos Sarym, Maksım Kaznacheev, Islam Kýraev jáne Rasýl Jumaly, Eýrazııalyq ıntegratsııa ınstıtýtynyń dırektory Erlan Saırov, Qoldanbaly zertteýler ortalyǵynyń basshysy Rahym Oshaqbaev, sarapshylar ıAralı Halılov, Nurlan Mahmýdov, Bella Gadzıeva, Lázzat Nurqatova jáne taǵy basqalary bar.
Kezdesýde sóılegen «Nur Otan» hatshysy Arman Qyryqbaevtyń atap ótkenindeı, Elbasy-partııa Tóraǵasy Nursultan Nazarbaevtyń tapsyrmasyna oraı jumys toby Úkimetpen birge eki aı ishinde, burynǵy tájirıbe men álemdik trendterdi eskerip, qoǵamnyń suranysyn nazarǵa ala otyryp, baǵdarlamany pysyqtady.
Elimiz boıynsha 70-ke jýyq fokýs-toptar ótkizildi, sonyń aıasynda memlekettik organ qyzmetkerleriniń de, partııalyqtardyń da suranysy men talap-tilekteri zerdelendi.
Eger baǵdarlamanyń bastapqy jobasy salalyq sıpatqa ıe bolsa, pysyqtalǵannan keıin besjyldyq qujatta halyqtyń barlyq tobynyń suranysy barynsha qamtyla tústi.
Bul rette «Nur Otan» partııasynyń baǵdarlamasy Prezıdent Qasym-Jomart Toqaevtyń saılaýaldy tuǵyrnamasyna jáne halyqqa arnaǵan Joldaýynda kórsetilgen mindetterine negizdelgen. Atalǵan qujattardaǵy tujyrymdamalyq ıdeıalar partııanyń saılaýaldy baǵdarlamasynyń naqty ındıkatorlarynda, sharalary men mindetterinde kórinis tapty.
Kezdesýge qatysýshylardyń aıtýynsha, «Nur Otan» partııasynyń baǵdarlamasy pandemııadan týyndaǵan kúrdeli ekonomıkalyq ahýalǵa qaramastan aýqymdy bola túsken. Sonymen birge olar «Nur Otan» partııasynyń respýblıkalyq partııaishilik saılaý aýqymynda ótkizgen praımerızin joǵary baǵalady.
Sarapshy Bella Gazdıevanyń aıtýynsha, praımerızdiń arqasynda azamattardyń ózekti usynystary men talap-tilekteri jınalyp, baǵdarlama jobasyna engen. Óz kezeginde saıasattanýshy Maksım Kaznacheev partııa aldaǵy saılaý naýqanynyń kún tártibin aıqyndap alǵanyn atap ótti.
«Bul baǵdarlama partııanyń daǵdarys jaǵdaıyna jedel den qoıa otyryp, ýaqytpen qatar qadam basyp kele jatqanyn kórsetedi. Ótken praımerız partııanyń júıeli jańarýǵa daıyn ekenin dáleldedi. Partııaishilik irikteý barysynda belsendi tulǵalardy anyqtaýǵa múmkindik týdy. Partııaǵa jańa músheler, onyń ishinde óz salasynyń tanymal tulǵalar kirdi. Óńirlerdegi pikirtalastarda baǵdarlamalardyń qyzý talqylanýy qorytyndy qujatta naqty problemalardyń eskeriletinin bildiredi», - dep atap ótti Maksım Kaznacheev.
Kezdesý qorytyndysynda qatysýshylar ózderiniń birqatar usynysyn alǵa tartty. Partııa hatshysy Arman Qyryqbaevtyń aıtýynsha, olardyń barlyǵy qaralyp, eskeriletin bolady.
Esterińizge sala keteıik, partııa Lıderi Nursultan Nazarbaevtyń tapsyrmasy boıynsha «Nur Otan» ár óńir, qala jáne aýdan boıynsha 216 saılaýaldy baǵdarlamanyń jobalaryn ázirledi.
Jobalar óńirlerdegi, onyń ishinde eldiń eń shalǵaı eldi mekenderindegi halyqpen kezdesýlerdiń qorytyndylary boıynsha qalyptastyrylǵan túıindi máseleler kartasy negizinde ázirlendi.
Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý aıasynda baǵdarlamalardyń barlyq jobalary praımerız barysynda turǵyndarmen keńinen talqylandy. Qabyldanǵan óńirlik baǵdarlamalarda azamattardyń 17 myń usynys pen eskertýleriniń 80% astamy eskerilgen.