Sarapshylar koronavırýs vaktsınasynyń keri áserleri týraly: «Qalypty reaktsııa»

NUR-SULTAN. QazAqparat – Birikken Ulttar Uıymynyń Vaktsınalardyń qaýipsizdigi jónindegi kishi komıtet músheleri COVID-19 vaktsınatsııasyn alǵannan keıin keıbir naýqastarda kezdesetin tumaý belgilerine uqsas janama áserler týraly málimetterdi zerttedi. Sarapshylar bul sımptomdar qaýipti emes jáne aǵzanyń vaktsınaǵa qalypty reaktsııasy degen qorytyndyǵa keldi. QazAqparat bul týraly BUU jańalyqtary saıtyna silteme jasap habarlaıdy.

Kishi komıtet músheleri vaktsınanyń klınıkalyq synaqtary barysynda alynǵan derekterdi zerdelep, olardy janama áserler týraly birneshe elden kelip túsken habarlamalarmen salystyrǵan. Sımptomdardyń qatarynda bas aýrýy, álsizdik, bulshyqet aýrýy, dene qyzýy jáne qaltyraý bar. Olar álsiz nemese ortasha dárejede bilinýi múmkin, ádette birneshe kún ishinde ketedi. Mundaı janama áserler 55 jasqa deıingi naýqastarda jıi kezdesedi.

DDSU kishi komıtetiniń músheleri tumaýǵa uqsas belgiler kez kelgen ekpege ımmýndyq jaýaptyń kórinisi bolýy múmkin ekenin atap ótti. COVID-19-ǵa qarsy vaktsınalarǵa keletin bolsaq, olardyń pikirinshe, mundaı janama áserler «kútilgen jaǵdaı». DDSU sarapshylary vaktsınalaýdyń qaýipsizdigi men tıimdiligi kórsetkishterin eskere otyryp, ekpe saldyrýǵa taǵy da keńes berýde. Qazirgi ýaqytta sarapshylar buǵan deıin ázirlengen usynystarǵa ózgeris engizý qajet dep sanamaıdy.

Sonymen birge, olar patsıentterge tumaýǵa uqsas belgiler týraly habarlaýǵa jáne qajet bolǵan jaǵdaıda olarǵa medıtsınalyq kómek kórsetýge keńes beredi. Sarapshylar vaktsınanyń birinshi dozasyn engizgennen keıin paıda bolǵan sıpattalǵan jaǵymsyz qubylystar ekinshi dozany salýǵa kedergi bolmaýy tıistigin atap kórsetedi.