Sarapshylar Qazaqstandaǵy mal dárigerlik baqylaý júıesin baǵalady

ALMATY. QazAqparat - Halyqaralyq sarapshylar toby Qazaqstandaǵy mal dárigerlik baqylaý júıesimen, onyń ishinde iri jáne usaq maldarǵa qaýipti kesel - aýsylmen kúres jumystarymen tanysty, - deıdi «QazAqparat» HAA tilshisi.

2015 jyly Halyqaralyq epızootııalyq bıýro (HEB) Qazaqstannyń  soltústik, ortalyq jáne batys aımaqtaryn qosalqy vaktsınalaýdy qajet etpeıtin aýsyldan aýlaq 9 oblysqa bóldi. Sol jyly memleket Almaty, Shyǵys Qazaqstan jáne Qyzylorda oblystaryn vaktsınalaý aımaqtaryna engizý týraly ótinish bergen edi.

«Biz mundaǵy mal dárigerlik baqylaý, epıdemıologııalyq saraptama jáne aýrýdy erte kezden anyqtaý júıesi qalaı júzege asyrylatyndyǵyn qadaǵaladyq. Sońǵy 6 jylda Qazaqstan aýsylmen kúres jolynda aıtarlyqtaı jetistikterge qol jetkizdi», - dedi táýelsiz sarapshy Djozef Domenık (Frantsııa).

«HEB erejelerine sáıkes, biz jyl saıyn aımaqtardyń aýsyldan tazarǵandyǵyn epızootııalyq bıýroǵa dáleldep otyrýymyz kerek. Bizdiń ótinishimiz qabyldanǵan jaǵdaıda, qarasha aıynyń ózinde jasalǵan jumystarǵa esep berýge mindettimiz», -  dedi QR Aýyl sharýashylyǵy mınıstrligi Mal dárigerlik baqylaý jáne qadaǵalaý komıtetiniń tóraǵasy Jomart Núrkenov.

Eger elimizdiń 5 oblysy aýsyl keselinen  taza terrıtorııa retinde moıyndalsa, qazaqstandyq et jáne sút ónimderi tutastaı taza ónim retinde baǵalanyp, otandyq aýylsharýashylyq óndirýshilerine óz taýarlaryn eksporttaýǵa jańa múmkindikter týady.