Sarapshylar Qazaqstandaǵy ınternet sapasy nege tómendep bara jatqanyn túsindirdi

ASTANA. QazAqparat – GSMA qaýymdastyǵynyń (búkil álem boıynsha uıaly baılanys operatorlarynyń múddesin qorǵaıtyn uıym – red.) jýyqtaǵy esebinde Qazaqstadaǵy uıaly baılanysty retteýdiń úzdik tájirıbesi men sektordy ári qaraı qamytýǵa bolatyn osal tustardy atady. Bul týraly QazAqparat Ranking.kz resýrsyna silteme jasap habarlaıdy.

«Derekterdi berý trafıginiń udaıy ósýi baılanys operatorlaryn qaıta-qaıta jeli syıymdylyǵyn arttyrýǵa májbúrlep otyr. Ol úshin bazalyq stansalardyń sanyn ósirip, spektrlerdiń tıimdiligin, resýrstyń jıiligin arttyryp otyrý qajet. Al bazalyq stansalar sanyn arttyrý bir jaǵynan óte qymbat bolsa, ekinshi jaǵynan jeli syıymdylyǵyn arttyrýdyń eń bir tıimsiz tásili sanalady. Operatorlar jaıshylyqta bul tásilge júginbeýge tyrysady. Onyń ornyna keńjolaqty jıilik dıapazondaryn berý - syıymdylyqty ulǵaıtýdyń negizgi joly delinedi. Búkil álemdegi sııaqty Qazaqstanda da beriletin derekterdiń kólemin ulǵaıtý úshin operatorlarǵa qosymsha rıdıojıilikter berý kerek. Birinshi kezekte arnasynyń keńdigi 100 MGts bolatyn 3,5 GGts-tik dıapazondar qajet. Qazaqstan bul turǵyda jumys istep jatqanymen spektr bólýde birqatar problema bar», - dep jazady Ranking.kz.

Qaýymdastyq sarapshylary bazalyq stansa salý erejesin ońaılatý kerektigin aıtqan.

Antennaly machta qurylǵysyn ornatyp, uıaly baılanys jelisin tartý úshin operatorlarǵa óte kóp ruqsat pen saraptamalar rásimdeý kerek.

Al bul kóp ýaqyt pen orasan shyǵyndy talap etedi. Operatorlardyń sózinshe, Qazaqstanda bul rásimderge jylǵa jýyq ýaqyt ketedi.

Sarapshylar páter ıeleriniń ınternet tartýǵa ruqsat alý protsesi de qıyn ekenin atap ótken.

«Sanıtarlyq-epıdemıologııalyq qorytyndy alýǵa turǵyndar arasyndaǵy radıofobııa kedergi keltirip otyrsa kerek. Memlekettik nemese mýnıtsıpıaldyq menshikte turǵan ınfraqurylymǵa qol jetkizýde de qıyndyqtar bar. GSMA baǵalaýynsha, Qazaqstandaǵy uıaly baılanystyń tarıfi kóptegen elmen salystyrǵanda aıtarlyqtaı tómen. Degenmen mundaı tómen baǵa tsıfrlandyrý salasyn damytýǵa kedergi bolyp otyr. Tarıfterdi memleket deńgeıinde retteý naryq zańdylyqtary men baılanys operatorlarynyń bıznes modelin buzady. Bul jeliler ınfraqurylymyna ınvestıtsııa tartýdy qıyndatady. Osydan kelip qyzmet sapasy nasharlaıdy. Halyqaralyq tájirıbege súıensek, 4G jáne 5G jelilerin damytý úshin kóptegen elderdiń úkimeti operatorlardyń salyq júktemesin azaıtyp otyr. Sarapshylar uıaly baılanys tarıfi men sapasyn retteýde memlekettiń qatysyn alyp tastaýdy usynyp otyr. Olardyń paıymynsha bul operatorlardyń salaǵa ınvestıtsııa tartýyn qıyndatady», - dep jazady Ranking.kz.