Sarapshylar Eýroodaq elderinde tvındemııa bastalǵanyn boljap otyr

NUR-SULTAN. QazAqparat – Sarapshylar Eýroodaq elderinde uzaq tvındemııa bastalǵanyn boljap otyr. Reseıde bir táýlikte koronavırýstan 700-ge jýyq adam qaıtys boldy. Bul týraly Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram-kanalynda málim etildi, dep habarlaıdy QazAqparat.

SARS-COV-2 vırýsy pandemııanyń jańa sıpattamalaryn týdyryp otyr. Eýropada tvındemııanyń bastalýy nemese ınfektsııanyń uzaq aǵymy týraly aıtyla bastady. EO elderinde JRVI-men jáne tumaýmen syrqattaný qarqyny artqandyqtan, sarapshylar tumaý men COVID-19 juqtyrǵan patsıentterdiń bir ýaqyttaǵy joǵary deńgeıi – uzaq tvındemııanyń bastalǵany týraly aıtýǵa bolatynyn boljaýda. «Tumaý vırýsynyń oralýy aýrýdyń uzaq taralý maýsymynyń bastaýy bolýy múmkin, ol ádette jazǵa deıin sozylady», - dedi Pasi Pentinen Eýropalyq aýrýlardyń aldyn alý jáne baqylaý ortalyǵynyń sarapshysy.

Mamandar tvındemııa Eýroodaq elderiniń koronavırýsqa qarsy kúrespen aınalysatyn densaýlyq saqtaý júıelerine shamadan tys júkteme túsiretinin atap ótti.

Reseıde koronavırýsty juqtyrý qarqyny artyp keledi. Ótken táýlikte COVID-19 vırýsyn juqtyrýdyń 31 252 jaǵdaıy anyqtaldy. Eń kóp derek eldiń iri qalalarynda tirkeldi: Máskeýde - 8 342, Sankt-Peterbýrgte – 4 078. Bir táýlikte indet saldarynan 688 naýqas qaıtys boldy. Jalpy, koronavırýstyń taralýy bastalǵannan beri Reseıde COVID-19 ınfektsııasyn juqtyrýdyń 10 865 512 jaǵdaıy tirkeldi. Kóz jumý jaǵdaılary 322 678-di qurady. Resmı málimetterge sáıkes, 76,6 mıllıonǵa jýyq reseılik koronavırýsqa qarsy vaktsınatsııanyń tolyq kýrsynan ótti. Covid-19-ǵa qarsy 10,8 mıllıon azamat revaktsınalandy.