Sarapshylar bıylǵy Ortalyq Azııadaǵy 10 negizgi oqıǵaǵa sholý jasady

ASTANA. QazAqparat - Bıyl batys pen shyǵys álemin baılanystyryp turǵan aımaqtyń damý baǵdary qandaı bolady? Qazaqstannyń strategııalyq damý ortalyǵynyń sarapshylary aımaqtyń damýyna áser etetin 10 negizgi oqıǵaǵa sholý jasady, dep habarlady Habar 24 telearnasy.

Birinshiden Ortalyq Azııada demografııalyq ósim deńgeı ulǵaıady, - deıdi sarapshylar. «Eger 25 jyl buryn óńirde 51 mln halyq tursa, bıyl bul kórsetkish 70 mln-nan asýy múmkin. Sonymen birge bıylǵy jyly Astanada ótetin halyqaralyq Ekspo kórmesi, Almatydaǵy búkilálemdik Ýnıversıada, Shanhaı yntymaqtastyq uıymynyń sammıti bar. Buǵan qosa, Qytaı men Reseıdegi ishki saıası reformalardyń júzege asýy, Túrkııadaǵy memlekettik bıliktegi modernızatsııa men Irandaǵy prezıdent saılaýy aımaqtaǵy saıası-ekonomıkalyq damýǵa áser etpeı qoımaıdy» - deıdi otandyq saıasattanýshylar.

- Sosyn bıyl sholýǵa engizip otyrǵan taǵy bir kórsetkish - Ortalyq Azııa aımaǵynda turǵyndardyń 50 paıyzy kem degende ınternetke jáne áleýmettik jelilerdi keńirek qoldanatyn bolady. Bul da jańa shynaıylyqty qalyptastyratyn bolady. Bul jaǵdaımen de jergilikti bılikter, respýblıkalar úkimetteri qalaı bolǵanda da ózderiniń saıasattarynda eskerý kerek bolady, - deıdi Qazaqstannyń strategııalyq zertteýler ınstıtýtynyń dırektory Erlan Qarın.