Sarapshy: Joldaý - pandemııadan sabaq alyp, odan shyǵýdyń jospary

NUR-SULTAN. QazAqparat – Prezıdenttiń keshegi Joldaýy eldi pandemııalyq jaǵdaıdan shyǵarý jospary. Joldaýda pandemııa kezindegi basty túıtkilder qaralǵan. Joldaýǵa qatysty osy jáne ózge de oıyn «Rýhanı jańǵyrý» qoǵamdyq damý ınstıtýty Qoǵamdyq protsesterdi zertteý ortalyǵynyń jetekshisi Qazbek Maıgeldınov ortaǵa saldy, dep habarlaıdy QazAqparat tilshisi.

«Joldaýda kópshilik kútken jaıt, halyqtyń ál-aýqatyn arttyrý. Ózderińiz bilesizder, pandemııa kezinde eldiń áleýmettik jaǵdaıy eń túıitkildi máseleniń biri boldy. Ol degenimiz kóp balaly analardyń talaby, jumyssyzdyq jáne shaǵyn jáne orta bıznes máseleleri taǵy sol sııaqty. Osy túıitkilderdi Prezıdenttiń nazarda ustaǵany kórinip tur. Bul jolǵy Joldaý pandemııadan sabaq alyp, endi odan shyǵý jospary. Naqty toqtalsaq, byltyr pandemııa kezinde búkil el bolyp talqylaǵan 42 500 teńge, endi 60 myńǵa jetip otyr. Prezıdent dárigerler men muǵalimderdiń eńbegin baǵalaý kerektigin únemi aıtady, nátıjesinde olardyń jalaqysy kóterildi», - dedi Qazbek Maıgeldınov.

Onyń aıtýynsha, Memleket basshysy eldiń aldaǵy damý jolyn kórsetti endigi maqsat ony halyqqa túsindirý men oryndaý.

«Prezıdent aıqyndaǵan taǵy bir jaıt, azamattyq qyzmetshilerdiń eńbekaqysyn kóterý. Halyq úshin jasalyp kelesi múmkindiktiń biri - zeınetaqy jınaǵynyń belgili bir bóligin Otbasy bankindegi depozıtke aýdarý. Bul óte mańyzdy, sebebi osyǵan deıin bolǵan «Baspana-hıt», «7-20-25» turǵyn úı baǵdarlamalary óz máresine jetip otyr. Demek jańa múmkindik kerek. Meni qýantqan kelesi másele eńbek naryǵyn retteý. Qazirgi tańda kóleńkeli ekonomıkada jumys istep jatqan jaldamaly jumysshylardyń qatary az emes. Ony zańdastyrý kerek, birinshiden jalaqysy tómen, ekinshiden olarǵa qandaı eńbek talaby qoıylyp jatqanyn eshkim bilmeıdi. Halyqty jıi mazalaıtyn azyq-túlik baǵasynyń turaqsyzdyǵyn da Memleket basshysy basa aıtyp ótti» , - deıdi ol.

Sondaı-aq, sarapshy Prezıdent Joldaýda júktegen tapsyrmaǵa Úkimet búginnen kirisý kerek degen oıyn alǵa tartty.

Buǵan deıin Q. Maıgeldınov Qazaqstanda qoǵamdaǵy túıitkildi máselelerdi taldaıtyn sarapshylar klýby qurylǵanyn málim etken edi.