Sarapshy ýtıl alymy týraly: 50 paıyzǵa deıin tómendetý - oryndy sheshim

NUR-SULTAN. QazAqparat – Qazaqstan avtobıznes qaýymdastyǵynyń ókili Qaırat Elamanov ýtıl alymnyń tómendeýi jáne búgin ǵana jarııalanǵan bastapqy jarnasyz jeńildetilgen jańa avtonesıe baǵdarlamasyna qatysty sala mamany retinde pikir bildirdi, dep habarlaıdy QazAqparat tilshisi.

«Búgin Úkimet jarııa etken ýtıl alymdy 50 paıyzǵa deıin tómendetý - oryndy sheshim. Degenmen atalǵan shara otandyq avtomobıl baǵasyn retteýge sonshalyqty áser etpeıdi. Sebebi Qazaqstanda avtomobıl satýda otandyq óndirýshiler úlesi - 65 paıyz. Bilemiz, Qazaqstanda KIA, Chevrolet, Lada, Hyundai jeńil kólikteri jasalady. ıAǵnı joǵaryda atalǵan markaly kólikterge ýtıl alymnyń aıtarlyqtaı áseri joq», - dedi Qaırat Elamanov.

Onyń aıtýynsha, elimizde avtokólikterdiń baǵasy dıller jáne dıstrıbıýtorlarǵa baılanysty.

«Árıne, baǵany memleket belgilemeıdi, memleket jaǵdaı jasaıdy, múmkindik beredi. Osy oraıda qazir memleket otandyq kólik óndirýshilerge jaǵdaı jasap otyr. ıAǵnı, endigi ýaqytta otandyq óndirýshiler ýtıl alymdy kóliktiń baǵasyna qospaıdy. Búgin Úkimette aıtylǵan taǵy bir mańyzdy shara - avtokólik alǵysy keletinder úshin bastapqy jarnasyz, jeńildetilgen nesıe berýdi jetildire túsý. Baǵdarlamaǵa suranys bar, sátti iske asyp keledi. Onyń nátıjesin qazirdiń ózinde kórip otyrmyz. Qazir kólik alý kezeginde 15 myńdaı adam tur. Menińshe, atalǵan shara halyq pen qoǵam úshin óte paıdaly», - deıdi sarapshy.

Aıta ketsek, búgin elimizde avtokólik ýtılalymy 50 paıyzǵa deıin tómendeıtini aıtyldy.

Sondaı-aq, Qazaqstanda bastapqy jarnasyz jeńildetilgen jańa avtonesıe baǵdarlamasy jarııalandy.