Sarapshy: tárbıeshiniń mártebesin kóterý – jastardyń mamandyqqa degen qyzyǵýshylyǵyn oıatady

NUR-SULTAN. QazAqparat – 2021 jylǵy derek boıynsha Qazaqstanda 6,1 mln astam bala bar. Olardyń bilim alýy, densaýlyǵy – memleket úshin óte mańyzdy másele. Sondyqtan da, bilim sapasyn arttyrý memlekettik saıasattyń basym baǵyttarynyń birine aınalyp otyr. Osy taqyryp aıasynda Ekonomıkalyq zertteýler ınstıtýty AQ (ERI) ortalyǵy dırektorynyń orynbasary Altyngúl Ótebaevamen sóılesken edik.

Memleket basshysy keshegi Joldaýynda bilim salasy ult sapasyn jaqsartý isinde asa mańyzdy ról atqaratynyn, sondyqtan da mektepke deıingi tárbıe jumysy basty nazarda bolýy kerek ekenin basa aıtyp ótti. «Bizde ekiden alty jasqa deıingi balalardyń jartysynan astamy ǵana balabaqshaǵa barady. Mundaı olqylyqqa jol bermeı, barlyq balanyń balabaqshamen qamtamasyz etilýin túpkilikti sheshý qajet», - dedi Memleket basshysy.

Osy oraıda, Ekonomıkalyq zertteýler ınstıtýty AQ (ERI) ortalyǵy dırektorynyń orynbasary resmı derekterge súıenedi.

«Elimizde 2021 jyldyń qorytyndysy boıynsha, balalar sany – 6 110 156. Bul – el halqynyń úshten biri balalar ekenin kórsetip otyr. Demek, mektepke deıingi bilim berý máselesi memleket úshin basymdyqqa ıe bolýy kerek. Alaıda, mektepke deıingi bilim berýmen balalardyń 52,8%-y ǵana qamtylǵan. Bul kórsetkishti kóterý qajet», - deıdi Altyngúl Ótebaeva.

Sonymen qatar, Memleket basshysy osy saladaǵy mamandarǵa qoıylatyn naqty talaptar bekitilýi tıistigin aıtty. «Olardyń jumys júktemesin de birtindep azaıtqan jón. Óz isine adal ustazdar bilim berý salasynyń damýyna zor úles qosady. Sondyqtan, balabaqshany emes, tárbıeshini attestatsııalaý qajet», - dedi Prezıdent.

Ekonomıkalyq zertteýler ınstıtýtynyń ókili bul rette tárbıeshilerdiń jalaqysyn ulǵaıtý, ıaǵnı olardyń áleýmettik mártebesin kóterý kerek dep sanaıdy.

«2025 jylǵa deıin tárbıeshilerdiń eńbekaqysyn jyl saıyn 25%-ǵa arttyrý júzege asyrylyp jatqanyna qaramastan, olardyń jalaqysy aıtarlyqtaı ósip jatqan joq. Munyń sebebi – tárbıeshilerdiń bazalyq mólsherlemesiniń deńgeıi tómen. Al, tárbıeshilerdiń áleýmettik mártebesin arttyrý – olardyń jalaqysyn kóterip qana qoımaı, jas mamandar úshin mamandyqtyń tartymdylyǵyn arttyrýǵa múmkindik bermek», - deıdi Altyngúl Ótebaeva.

Sondaı-aq, sarapshy Memleket basshysynyń Balalar jyly aıasynda «Ulttyq qor - balalarǵa» atty jańa baǵdarlamany júzege asyrý týraly tapsyrmasy da halyqtyń áleýmettik jaǵdaıyn jaqsartýǵa zor úles qosatynyna senimdi.

Eske salaıyq, Prezıdent Ulttyq qordyń jyl saıynǵy ınvestıtsııalyq tabysynyń 50%-yn balalardyń arnaýly jınaqtaýshy esepshotyna aýdarýdy usyndy. «Qarjy ár bala 18 jasqa tolǵanǵa deıin aýdarylyp turady, ony merziminen buryn esepshottan shyǵaryp alýǵa bolmaıdy. Jınaqtalǵan qarjy balalar kámelet jasyna tolǵannan keıin olardyń baspana nemese bilim alýyna jumsalatyn bolady... Bastamany muqııat ázirleý qajettigin eskere otyryp, jobany 2024 jylǵy 1 qańtardan bastap iske qosýdy tapsyramyn», - dedi Memleket basshysy.

«Balalarǵa shot ashylyp, kámelet jasyna tolǵanǵa deıin memleket tarapynan ınvestıtsııa quıý – bolashaqqa degen senimdi arttyrady. Onyń ústine, 18 jasqa tolǵannan keıin qarajatty oqý aqysyn tóleýge jumsaýǵa bolatyny qýantady. Bul da halyqtyń áleýmettik jaǵdaıynyń jaqsarýyna birden-bir septigin tıgizetini sózsiz», - deıdi sarapshy.

Nazerke Súıindik