Sarapshy «Rýhanı jańǵyrý» baǵdarlamasynyń qoldaýǵa eń kóp ıe bolǵan baǵyttaryn atady

ASTANA. QazAqparat - QR Prezıdenti janyndaǵy QSZI-diń Áleýmettik-saıası zertteýler bóliminiń meńgerýshisi Alýa Joldybalına Memleket basshysynyń «Rýhanı jańǵyrý» baǵdarlamasy aıasynda zor qoldaýǵa ıe bolǵan jobalardy atady, dep habarlaıdy QazAqparat tilshisi.

Qazaqstan halqy Assambleıasynyń HHVІ sessııasy aıasynda ótkizilgen «Keń aýqymdy qazaqstandyq ulttyq biregeılik: syrtqy kózqaras» atty QHA Ǵylymı-sarapshylyq keńesiniń otyrysynda Alýa Joldybalına «Rýhanı jańǵyrý» baǵdarmasy aıasynda júrgizilgen zertteý jumysynyń qorytyndysymen tanystyrdy.

«2017 jyldyń sońy men 2018 jyldyń basynda júrgizilgen zertteý jumystarymen tanystyryp ketkimiz keledi. Bul «Rýhanı jańǵyrý» baǵdarlamasyna baılanysty. Baǵdarlamada ulttyq biregeılikti saqtaý máselesine tereńirek mańyz berilgen bolatyn. Osy rette baǵdarlamanyń baǵyttarynyń qandaı ındıkatorlary bolýy kerek, jobalardyń sátti júzege asýy qalaı baǵalanatyn bolady? Bul suraqtarǵa jaýap alý úshin atalǵan zertteý jumystaryn júrgizdik. Zertteý aldaǵy ýaqytta da jalǵasyn tabatynyn aıta ketkim keledi», - deıdi ol.

Alýa Joldybalınanyń aıtýynsha, jalpy, zertteý jumystary kórsetip otyrǵandaı, baǵdarlamanyń jobalary ishinde eń zor qoldaýǵa ıe bolý dárejesine qaraı - kezeń-kezeńmen latyn qarpindegi qazaq álipbıine kóshý (83 paıyz), «Qazaqstannyń 100 jańa esimi» jobasy (70 paıyz) bolsa, ortasha kórsetkish retinde «Qazaqstannyń qasıetti geografııasy» men «100 jańa oqýlyq» jobalaryn atap ótýge bolady.

«Biraq, osy tusta aıta keterligi, jobalar týraly keń-molynan aqparat berilgennen keıin «Qazaqstannyń qasıetti geografııasy» men «Týǵan jer» kishi baǵdarlamasy eń kóp qoldaýǵa ıe jobalardyń kóshin bastady. Demek, alty irgeli baǵyttyń ishinde kóshbasshysy jáne qoldaýǵa ıe bolǵandardyń ishinde dál osy atap ótkenimdeı - «Qazaqstannyń qasıetti geografııasy» men «Týǵan jer» aldyńǵy qatarǵa shyqty», - deıdi ol.

Zertteýshiler toby sonymen qatar, baǵdarlama aıasynda qolǵa alynǵan jobalar qaı baǵyttardyń damýyna qalaı serpin beretinin baıqap kórýge tyrysqan.

«Sarapshylardyń pikirinshe, «100 jańa oqýlyq» pen «Latyn álipbıine kóshý» básekege qabilettilik turǵysynan keleshek býynǵa zor áseri tıgizedi. «100 jańa oqýlyq» jobasy bilim kýlty men básekege qabilettilik turǵysynan zertteý jumystary barysynda kóp ataldy. Ulttyq biregeılikti saqtaý baǵytynda «Týǵan jer» jáne «Qazaqstannyń qasıetti geografııasy» erekshe úles qosary sózsiz», - deıdi Alýa Joldybalına.