Sarapshy: Ózbekstandaǵy Qazaqstan jyly - baýyrlastyqtyń úzilmes dánekeri
«Shyndyǵyna kelgende bul Qasym-Jomart Toqaevtyń shetelge alǵashqy memlekettik sapary sanalady. Muny Ortalyq Azııanyń kóshbasshy eki eli basshylarynyń salystyra tekserýi der edim. Ózbekstandaǵy Qazaqstan jylynyń ashylýy da strategııalyq seriktestik qarqynynyń, senimniń kúsheıe túsýiniń, ózara qoldaýdyń, eki el arasyndaǵy baýyrlastyqtyń úzilmes dánekeriniń dáleli. Qazaq-ózbek kelissózderi syndarly rýhta ótti. Kezdesý qorytyndysynda yntymaqtastyqtyń túrli salalaryn qamtıtyn shamamen 10 memleketaralyq qujat rásimdeldi. Munyń ózi de talaı jaıttan syr beredi», - dedi sarapshy.
Onyń paıymynsha, bul sapar eń aldymen Nur-Sultannyń da, Tashkenttiń de tarapynan óńirlik ózara is-qımyldy keńeıtýge jáne tereńdetýge baǵyttalǵan qoldanystaǵy syrtqy saıasatynyń sabaqtastyǵyn saqtaýǵa yqpalyn tıgizedi.
«Ekinshiden, ekonomıkadaǵy ózara tıimdi yntymaqtastyqty údetip, 2020 jyldyń sońyna qaraı ekijaqty saýda kólemin 5 mlrd dollarǵa deıin ósirýge múmkindik beredi. Úshinshiden, ǵylym, bilim, mádenıet, óner, týrızm, sport jáne basqa da salalardaǵy yntymaqtastyq kúsheıedi. Munan ary halyqaralyq jáne óńirlik formattaǵy yntymaqtastyq máseleleri qozǵalady. Bul - óńir qaýipsizdigine qazirgi syn-qaterlerge, eń aldymen halyqaralyq terrorızmge, dinı ekstremızmge, esirtki saýdasyna, transulttyq uıymdasqan qylmysqa, zańsyz kóshi-qonǵa qarsy turý. Óńir elderiniń Aral teńizi basseınindegi naqty baǵdarlaramalar men jobalardy júzege asyrý boıynsha halyqaralyq uıymdarmen, qarjylyq jáne ekologııalyq ınstıtýtarmen ózara is-qımyldaryn keńeıtý arqyly Araldy qutqarý halyqaralyq qory aıasyndaǵy ekijaqty tıimdi yntymaqtastyq mańyzdy», - dedi ol.
Foto: atyraukelisim.kz