Sarapshy «Ordabasy» - «Legııa» oıynyndaǵy daýly sátke pikir bildirdi
Qazaqstan klýby eýrokýboktaǵy jańa maýsymdy varshavalyq «Legııa» komandasymen kezdesýden bastaǵan bolatyn. Shymkente ótken oıyn 2:2 esebimen teń aıaqtaldy.
«Ordabasy» oıynnyń 13 mınýtynda Vsevolod Sadovskıı soqqan goldyń arqasynda alǵa shyqty. Ekinshi taımda Mamadý Mbodj esepti eseleı tústi. Degenmen, «ordabasylyqtar» basymdyqty oıyn sońyna deıin saqtaı almady. Matchtyń 63-mınýtynda qonaqtar sapynan Tomash Pekgart gol soqsa, 86-mınýtta Blaj Kramer esepti teńestirdi.
Oıyn barysynda daýly sát te oryn aldy.
«Iá, dop berý kezinde Vsholekke qaraǵanda Blaj Kramer qaqpaǵa taqaý boldy. Vsholoev oń qaptalda oınaıtyn qorǵaýshy, al matchta VAR júıesi (vıdeoqaıtalaý) bolǵan joq jáne soǵan baılanysty tóreshiler brıgadasy aǵattyq jiberdi. Bobýr Abdýholıkovke qatysty sátte de ol burylǵan kezde Kramerdiń aıaǵyna tıip ketti. Bul jerde ádeıi aıaǵyn alǵa sozbaǵan da bolýy múmkin. 89-mınýtta aıyp alańynda oryn alǵan bul jaıttan keıin 11 metrlik aıyp dobyn belgileýge bolar edi. Bul sát osynaý eki matchtyq teke-tires nátıjesine kóp yqpal etýi múmkin óte mańyzdy oqıǵa. Jalpy, «Ordabasy» eki dop basymdyǵynan aıyrylyp qalǵannan keıin jeńiske degen senimin joǵaltyp alǵan sııaqty. Olarǵa óte qıyn oıyn boldy. Óıtkeni «Legııa» úılesimdiligi óte joǵary, oıyn órnegin birneshe myqty fýtbolshy arqyly órbitetin komanda ekendigin moıyndaýymyz kerek», - dedi agenttik tilshisine telefon arqyly pikir bildirgen Dıdar Qadyrov.
Aıta keteıik, qarymta oıyn 4 tamyz kúni Varshavada ótedi.