Sarapshy Nursultan Nazarbaevtyń Qytaıǵa saparyna qatysty pikir bildirdi

ASTANA. QazAqparat - QR Tuńǵysh Prezıdenti qory janyndaǵy Álemdik ekonomıka jáne saıasat ınstıtýtynyń sarapshysy Anton Býgaenko Memleket basshysy Nursultan Nazarbaevtyń Qytaı Halyq Respýblıkasyna jasaǵan memlekettik saparyna qatysty pikir bildirdi, dep habarlaıdy QazAqparat tilshisi.

«Memleket basshysy Nursultan Nazarbaevtyń QHR-ǵa sapary ekijaqty qarym-qatynas úshin, ásirese eki el basshylarynyń tulǵaaralyq qarym-qatynasy turǵysynda úlken mańyzǵa ıe. Qytaıda sońǵy jarty jylda el úshin asa mańyzdy saıası ózgerister boldy. QHR kóshbasshysy Sı Tszınpın óz bıligin nyǵaıtty, al QHR-dyń jáne Qytaı kommýnıstik partııasynyń basshylar quramy aıtarlyqtaı ózgeriske ushyrady», - dep atap ótti ol.

Bıyl maýsymda Qazaqstan Prezıdenti Aspan asty elin uzaq ýaqyt boıy basqaratyn bolatyn Qytaı basshylarynyń jańa komandasymen kezdesti, dep túsindirdi sarapshy.

«Osy turǵydan alǵanda Qazaqstan basshylyǵynyń Sıdiń jańa komandasymen jeke baılanys ornatýy zor mańyzǵa ıe. Sondyqtan, QR Prezıdentiniń Tóraǵa Sı Tszınpınmen jáne premer Lı Ketsıanmen dástúrli kezdesýinen bólek, Búkilqytaılyq halyq ókilderi jınalysynyń (Qytaı parlamenti) jańa tóraǵasy Lı Chjanshýmen kezdesýi, sondaı-aq Turaqty komıtet pen úkimettiń basqa da múshelerimen qarym-qatynas ornatýynyń mańyzy erekshe. Qazaqstan men taıaýda ǵana saılanǵan Qytaı basshylyǵy arasynda jumys atmosferasy qalyptasý ústinde», - dep atap ótti Anton Býgaenko.

Anton Býgaenkonyń aıtýynsha, Qazaqstan asa tyǵyz ekonomıkalyq yntymaqtastyqqa umtylýda, óndirisi anaǵurlym aýqymdy salalar birtindep Qytaı naryǵyna bet alýda. Onyń pikirinshe, bul jerde elder úkimetiniń is-áreketiniń úılesimi burynǵydan da mańyzdyraq.

Sondaı-aq ol praktıkalyq turǵydan Qazaqstannan Qytaıǵa eksporttalatyn sıyr eti boıynsha veterınarlyq-sanıtarlyq, karantındik jáne ınspektsııalyq talaptary týraly Qazaqstan Respýblıkasy Aýyl sharýashylyǵy mınıstrligi men Qytaı Halyq Respýblıkasynyń Bas keden basqarmasy arasyndaǵy hattamaǵa qol qoıylýy asa mańyzdy ekenin aıtty.

Aıta keteıik, Elbasy Nursultan Nazarbaev Qytaıǵa memlekettik saparmen kelip, keshe QHR Tóraǵasy Sı Tszınpınmen keńeıtilgen quramda kelissózder ótkizdi.

Nátıjesinde birneshe qujatqa qol qoıyldy.

Sonymen qatar Memleket basshysy QHR Memlekettik keńesiniń premeri Lı Ketsıanmen, QR Prezıdenti Búkilqytaılyq halyq ókilderi jınalysy Turaqty komıtetiniń tóraǵasy Lı Chjanshýmen kezdesti.

Búgin, 8 maýsym kúni Nursultan Nazarbaev Beıjińde Halyq batyrlary eskertkishine gúldestesin qoıý sharasyna qatysty. 

Al 10 maýsym kúni QR Prezıdenti  Tsındao qalasynda ótetin Shanhaı yntymaqtastyq uıymyna múshe memleketter basshylarynyń keńesine qatysady dep kútilýde.