Sarapshy: «Nur Otan» partııasyn jańǵyrtý - ýaqyt talaby

ASTANA. QazAqparat - Qazaqstandyq partııalardyń basty ereksheligi - platformalardyń aınalasynda birigý emes, tulǵalardyń aınalasynda shoǵyrlanýy. «Nur Otan» partııasynyń 20 jyldyǵy aıasynda QR Tuńǵysh Prezıdenti qory janyndaǵy Áleýmettik ekonomıka jáne saıasat ınstıtýtynyń sarapshysy Aıman Júsipova óz pikirin bildirdi, dep habarlaıdy QazAqparat tilshisi.

«Nur Otan partııasynyń ıdeıalyq joly - tsentrızm saıasatynyń jetistiginde jatyr. Osy baǵyt el Prezıdenti Nursultan Nazarbaevtyń da eńbegin kórsete túsedi. Zertteý jumystarynyń nátıjesi kórsetip otyrǵandaı, bizdiń azamattar tsentrızm ıdeıasyn keń aýqymda qoldaıdy. Tsentrızm túsiniginiń ózin salystyrmaly túrde uǵýǵa bolady. Búkil partııalyq júıe mańyzdy máseleler men baǵyttardy elep-eksheı alady», - deıdi sarapshy.

Aıman Júsipovanyń aıtýynsha, búgingi tańda áleýmettik saıasatqa mańyz berilip otyr. Bul rette orasan zor resýrsqa ıe partııanyń mindeti - osy máselelerdiń naqty mán-jaıyn aıqyndaý bolmaq.

«Demek, «Nur Otan» partııasynyń jumysy Memleket basshysynyń saıasatyn júzege asyrýǵa, memlekettik baǵdarlamalardyń júzege asý sapasyn baqylaýǵa, halyqpen keri baılanys ornatýǵa, azamattar men bılik arasynda medıator bolýǵa baǵyttalýy kerek. Qoǵamdyq baqylaý jáne qoǵamdyq qabyldaý degen sekildi bastamalar sátti joba bola bildi. Qazirgi tańda partııa zamanǵa saı aqparattyq-kommýnıkatsııa quraldarynyń kómegimen azamattardy qabyldaýdy bastap ketti. Partııanyń qamtyp otyrǵan aýdtorııasy áleýmettik jelini eseptegen 6 mıllıon adamǵa jetedi. Sonymen birge, azamattardan kelgen usynystardyń bári de partııanyń jumysynda kórinis berip, baǵdarlamalyq qujattarǵa da enýi kerek», - deıdi sarapshy.

Aıman Júsipova atap ótkendeı, búgingi kúni partııa jańǵyrtý baǵdarlamalaryn júzege asyrý úshin óz jumysyn qaıta qurylymdaý mehanızmin izdestirý ústinde. Bul mindetti Prezıdent 2017 jyly júktegen edi.

«2018 jyly partııa tóraǵasynyń birinshi orynbasary bolyp Máýlen Áshimbaev taǵaıyndalǵan bolatyn. Partııa jumysyn qaıta qurylymdaý aıasynda pikirtalas alańdary quryldy. Bul baǵyt álbette, partııa jumysynyń mańyzdy baǵyty sanalady. Ol jumys aımaqtyq deńgeıge de shyǵý kerek. Sonymen birge, Prezıdent qoıǵan mindetterdi oryndaý úshin partııa jumysyn qaıta qurylymdaý aýqymdy ári júıeli sıpatqa ıe bolýy tıis. Jalpy, partııanyń jumysy azamattardyń máselelerin ornynda eskerip, halyqqa ashyq ári túsinikti sıpatqa ıe bolýy kerek», - deıdi ol.