Sarapshy munaı baǵasyna qatysty: Úkimettiń keshendi sharalary bar, úreı men qorqynyshqa negiz joq

NUR-SULTAN. QazAqparat - QR Ulttyq ekonomıka mınıstrliginiń Ekonomıkalyq zertteýler ınstıtýty Makroekonomıkalyq zertteýler men boljamdar ortalyǵynyń dırektorynyń mindetin atqarýshy Qýanysh Beısenǵazın mundaıdyń álemdik baǵasynyń quldyraýy jóninde pikir bildirdi, dep habarlaıdy QazAqparat.

«Munaıdyń baǵasy keshe 30 dollarǵa deıin tómendep, búgin 36 dollarǵa qaıta kóterildi. Bul jaǵdaıdy qysqamerzimdi quldyraý dep sanaımyz. Sebebi, bul quldyraýdyń artynda eshqandaı makroekonomıkalyq nemese daǵdarystyq jaǵdaı emes, OPEK+ aıasyndaǵy Saýd Arabııasy men Reseıdiń kelispeýshilikteri tur. OPEK+ quramyndaǵy jáne oǵan kirmeıtin elder arnaıy ýaǵdalastyqpen osy jyly munaı óndirisin azaıtýy qajet edi. Joǵaryda atap ótkendeı, bul quldyraýdy qysqamerzimdi dep sanaımyz. Sebebi munaıdyń tómen baǵasy ne Reseıge, ne Saýd Arabııasyna tıimdi emes. Sol sebepti, jaqyn arada bul másele boıynsha bir mámilege keledi dep oılaımyz», - dedi sarapshy QazAqparat tilshisine bergen jaýabynda.

Onyń aıtýynsha, munaı baǵasynyń qulaýy Qazaqstan úshin tosyn bolǵan joq.

«Sebebi, onyń aldynda koronavırýstyń órshýi, Qytaı tarapynan munaıǵa suranystyń azaıýy boıynsha sanaýlar júrgizilip, shekara jabylǵan jaǵdaıda, pandemııa óskende qandaı sharalar qoldaný qajettigi pysyqtalyp, daǵdarysqa qarsy baǵdarlama daıyndalǵan bolatyn. Sol sebepti, bizdiń memleket tarapynan qoldanylatyn sharalar kesheni bar. Ulttyq bank pen Úkimet málimdeme jasady. Sondyqtan, úreı men qorqynyshqa negiz joq», - dedi Q. Beısenǵazın.

QazAqparat osyǵan deıin álemdik munaı baǵasynyń quldyraǵanyn jáne osyqan qaraı QR Úkimeti men Ulttyq bank munaı naryǵyndaǵy jaǵdaıǵa baılanysty málimdeme jasaǵandyǵyn habarlaǵan bolatyn.