Sarapshy memlekettik satyp alýlardaǵy básekeni shekteıtin shemalardy atady
Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttigi janyndaǵy Arnaıy monıtorıng tobynyń múshesi Rahym Oshaqbev málimdedi.
«Memlekettik satyp alýlardyń 30% ǵana tıisti básekelik ortada ótken. Keı organdarda memlekettik qyzmetke qatysy joq zattar satyp alynǵan. (...) Osy oraıda, Memlekettik satyp alýlar salasyna qoǵamdyq baqylaý quralyn engizgimiz keledi. 2018 jyly memlekettik satyp alýlardyń shamamen 72,5% básekege shekteý qoıylǵan» , - dep atap ótti Rahym Oshaqbaev Memlekettik qyzmet isteri jáne sybaılas jemqorlyqqa qarsy is-qımyl agenttiginde ótken alqa jınalysynda.
Spıker básekelesterden ozý úshin óte tómen baǵa qoıatyndardy da erekshe atap ótti.
«Básekelesterdi keltirmeý úshin baǵany radıkaldy túrde tómendetetinder bar. Shyn máninde qyzmettiń quny anaǵurlym qymbat bolyp shyǵady. Tabylǵan jalǵyz jetkizýshi ondaǵan qosymsha kelisimdermen qajet qarjyny shyǵaryp alady. Bul úrdis keń etek alyp keledi, 2018 jyldyń alǵashqy jartysynda saraptama júrgizip, dál osyndaı 9 myń kelisimdi anyqtadyq. Ókinishke qaraı, normatıvtik-quqyqtyq baza jetildirilmegen jáne básekelestikti shekteıtin osyndaı shemalarmen kúresýge dármensiz», - dedi spıker.
Sonymen birge, R. Oshaqbaev memlekettik satyp alýlar konkýrsyna qoǵamdyq baqylaýdy kúsheıtýdy usyndy.
«Memlekettik qyzmetke qatysy joq kresloǵa jarııalanǵan konkýrs kórgende, uıymdastyrýshylar men Memlekettik qyzmet isteri agenttigine hat jiberýge eshteńe kedergi emes. Munda eshkim quqyqtyq tujyrym jasamaıdy, memorgandardyń ornyn baspaıdy. Qoǵam baqylaý jasap, boljam jasap, quqyqbuzýshylyq qaýpi týraly dabyl qaǵýy kerek», - dep óz sózin túıindedi R. Oshaqbaev.