Sarapshy QR Prezıdentiniń Máskeýge saparyna qatysty pikir bildirdi
Qazaqstan men Reseı kóshbasshylarynyń kezdesýi barysynda saıası, saýda-ekonomıkalyq, mádenı-gýmanıtarlyq salalardaǵy ekijaqty yntymaqtastyq máseleleri, sondaı-aq ózekti aımaqtyq jáne halyqaralyq tayryptar talqyǵa túspek. Sapar qorytyndysynda birqatar ekijaqty qujatqa qol qoıylatyndyǵy josparlanǵan.
Osy oraıda reseılik sarapshy, saıasattanýshy, Óńirlik problemalar ınstıtýtynyń dırektory Dmıtrıı Jýravlev qazaqstandyq jýrnalısterge bergen suhbatynda Qazaqstan Prezıdenti Q.Toqaevtyń saparyna Reseı tarapy qandaı mán beretindigin jáne ne kútetindigin aıtyp berdi.
«Qazaqstannyń jańadan taǵaıyndalǵan Prezıdenti óziniń birinshi resmı saparyn Reseıge jasaýy RF men QR arasyndaǵy aıryqsha qarym-qatynasqa jáne eki eldiń tyǵyz yntymaqtastyǵyna baılanysty. Kez kelgen eldiń jańa basshysy saparyn óz memleketine mańyzy zor elden bastap otyrady. Osyǵan oraı eger Qazaqstan Prezıdenti alǵashqy saparyn Reseıden bastasa, demek Qazaqstan úshin Reseı mańyzdy seriktes sanalady», - dedi D.Jýravlev.
Sarapshynyń atap ótýinshe, reseılik tarap Qazaqstannyń jańadan saılanǵan Prezıdenti Q.Toqaevpen QR Tuńǵysh Prezıdenti Nursultan Nazarbaev negizin qalaǵan strategııalyq baǵytty jalǵastyrýǵa múddelik tanytady jáne Qazaqstannyń jańa kóshbasshysymen jańa jaǵdaıda eki eldiń strategııalyq seriktestigi men yntymaqtastyǵyn nyǵaıtýdy qalaıdy.
«Qazaqstannyń Tuńǵshy Prezıdenti Nursultan Nazarbaevtyń mańyzy men róli Reseı úshin óte úlken jáne odan «keıin» ne bolatyndyǵy asa mańyzdy. Mine sol «keıin» sát kelip otyr. Sondyqtan biz úshin bul sapardyń «keıinnen» keıin «erteńniń» bolatyndyǵyn qýattaýy mańyzdy. Qazaqstannyń tuńǵysh Prezıdenti Nursultan Nazarbaevtyń osydan 25 jyl buryn Máskeý memlekettik ýnıversıtetinde jarııa etken strtagııalyq baǵytyn - Eýrazııalyq ıntegratsııany damytý baǵytyn jalǵastyra alatyndyǵyna senimim mol», - dedi reseılik sarapshy.
Sonymen qatar, reseılik sarapshy Qazaqstannyń qazirgi halyqaralyq qatynastardaǵy aıryqsha ornyna da basa nazar aýdaryp ótti.
«Onyń mańyzyn HH ǵasyrdaǵy Avstrııanyń rólimen salystyrar edim. Búginde Qazaqstan álemdik aýqymda dál sonldaı rólge ıe bolyp otyr. Qazaqstan bir mezette AQSh, Ulybrıtanııa, Reseı jáne arab elderi senim artatyn el bolyp otyr. Qazaqstan bul senim kredıtin izgi maqsattarǵa, Eýrazııadaǵy, jalpy álemdegi tártipti ornatýǵa jumsap otyr», - dedi D.Jýravlev.
Osy oraıda saıasattanýshy Qazaqstan Reseı men ózge elderdiń qarym-qatynasyn damytýda kópir de bola alatyndyǵyn basa aıtty.
«Qazaqstan ózge eldermen Reseıdiń arasynda kópir de bola alady. Máselen, qazirgi ýaqytta Reseıdiń Amerıka Qurama Shtattarymen qarym-qatynasy jaqsy emes ekendigi belgili. Sondyqtan bul vektorda Qazaqstannyń Reseı úshin kópir bola alatyndyǵy sózsiz. Kúntártibine áli túse qoımaǵa aýǵan problemasy da bar. Ony Qazaqstannyń qatysýynsyz sheshý shúbá keltiredi», - dedi ol.
Avtor: Medet Ahmetov