Sarapshy: Kenshilerdiń nóldik jaraqattaný baǵdarlamasyn qaıta qarap, talaptaryn kúsheıtý qajet

QARAǴANDY. QazAqparat – Eńbek qaýipsizdigi, eńbekti, qorshaǵan ortany qorǵaý jáne ornyqty damý komıtetiniń múshesi, Prezıdent janyndaǵy Ulttyq quryltaı múshesi Arman Qashqynbekov Lenın atyndaǵy shahtada bolǵan qaıǵyly oqıǵa týraly pikirimen bólisti. Onyń aıtýynsha, elimizdiń kásiporyndarynda nóldik jaraqattaný baǵdarlamasynyń talaptaryn qaıta qaraý jáne kúsheıtý qajet, dep habarlaıdy QazAqparat tilshisi.

Qaraǵandynyń kómir ónerkásibi qazir qara jamylyp otyr. Kenshilerdiń qaza bolýy múldem doǵarylýy tıis dep esepteıdi sarapshy Arman Qashqynbekov. Onyń paıymynsha, jaýapkershilik ınvestor kompanııaǵa, sondaı-aq kenshilerdiń qaýipsiz eńbek jaǵdaılaryn qamtamasyz etý máselelerine baqylaý júrgizetin barlyq ókiletti memlekettik organdarǵa júkteledi.

«Ókinishke qaraı, mundaı tótenshe jaǵdaı qazir qaıǵyly trendke aınaldy deýge bolady. Konstıtýtsııamyzda el azamatynyń ómiri memleket úshin basty baılyq bolyp tabylady. Sondyqtan osy sekildi oqıǵalarǵa muqııat tergeý júrgizip, bolashaqta buǵan jol bermeý úshin mańyzdy jáne qatań sharalar qabyldaý qajet. Bul ınvestor, ákimdik jáne Úkimet tarapynan birlese qabyldanýy tıis. Suranys ta barlyǵynan bolýy kerek. Kinálilerdi Qazaqstan azamaty ma, joq pa, oǵan qosa shenderine qaramastan, qylmystyq jaýapkershilikke tartý qajet», - dep esepteıdi Arman Qashqynbekov.

Al «ArselorMıttal Temirtaý» AQ-ǵa keletin bolsaq, kompanııanyń bolashaǵy zor, ıaǵnı kombınat pen shahtalar áli de birneshe ondaǵan jyldar jumys isteıtin bolady. Biraq ol úshin eń aldymen eńbek qaýipsizdigi týraly muqııat oılaný qajet. Sebebi bul alpaýyttar jumysshylardyń arqasynda jumys istep, paıda taýyp jatyr.

«ArselorMıttal Temirtaý» kompanııasynda 3 bólimshe bar: kómir, bolat jáne temir rýdasy. Qaraǵandy kómir basseıniniń koksteletin kómiri negizinen Temirtaýdaǵy metallýrgııa kombınatynda shoıyn, odan ári bolat balqytýǵa jumsalady. Elimizdiń bolashaq ónerkásibin bolatsyz elestetý qıyn bolǵandyqtan, Qaraǵandy kómir óndirýshileriniń de Qazaqstandy dekarbonızatsııalaý týraly jarııalanǵanyna qaramastan, aldaǵy jyldarda jumys isteıtin áleýeti zor. Sonymen qatar, AMT-da kompanııa qyzmetkerleriniń nóldik jaraqattanýyn qamtamasyz etetin «Way to 0» baǵdarlamasy burynnan qabyldanǵan. Investordyń birinshi basshylary men ýákiletti memlekettik organdardyń tikeleı jaýapkershiligimen ony qaıta qarap, talaptaryn kúsheıtý qajet», - dep atap ótti Arman Qashqynbekov.

Qaraǵandy kómir basseıniniń áli de baı ekendigi dáleldengen. Shamamen 10 jyl buryn qorlarynda 1 mıllıard tonnadan astam koksteletin kómiri bar ken oryndaryn zertteý boıynsha úlken jumys júrgizildi, bul kenshilerdi aldaǵy jyldarǵa jumyspen qamtamasyz etýdiń kepili boldy.

«Qaraǵandy kómir basseıniniń ken oryndarynda 700 mlrd tekshe metrge deıin metan gazy bar dep esepteledi. Bul is júzinde Saryarqa ortalyǵyndaǵy ekinshi alyp Qarashyǵanaq deýge bolady, ol elektr energııasyn óndirýge, eń aldymen, bolashaqta shahtalarda osyndaı TJ qaýpin azaıtýǵa paıdaly bolýy múmkin. Energetıka mınıstrliginiń balamaly energııa túrlerin qoldaý jónindegi zań jobasyn ázirleýdi jáne qabyldaýdy jedeldetý qajet. Bul máselege qatysty bir jyl buryn Ulttyq qoǵamdyq senim keńesiniń otyrysynda Prezıdent tapsyrma bergen», - dedi Prezıdenti janyndaǵy Ulttyq quryltaı múshesi Arman Qashqynbekov.

Foto: TASS/ Donat Sorokın