Sarapshy qazaqstandyqtardy sanaqshylardan jasyrynbaýdy surady
Qoǵamdyq keńes múshesiniń pikirinshe, halyq sanaǵy – kez kelgen memleket úshin ómirlik mańyzdy oqıǵa. Olardyń sany týraly málimetter qalaǵa jańa múmkindikter, sonyń ishinde qarjylyq múmkindikter ashýǵa kómektesedi.
«Almaty – qarqyndy ósip, belsendi damyp kele jatqan qala. Bizge turaqty turýǵa jáne jumys isteýge kóptegen adamdar keledi. Biraq turǵyndar neǵurlym kóp bolsa, áleýmettik jáne ınjenerlik ınfraqurylymǵa júkteme soǵurlym joǵary bolady. Megapolıstiń damýyn bolashaqqa josparlaý úshin halyq sany týraly naqty málimetter bolýy qajet», – dep esepteıdi Tımýr Nurtaev.
Ol sanaq qorytyndysy boıynsha jergilikti atqarýshy organdar bıýdjet qarajatyn turǵyndardyń ózekti máselelerin sheshýge qaıta bólip, kólik júktemesin durys josparlaı alatynyn aıtty. Budan basqa, nátıjeler áleýmettik baǵdarlamalardy ázirleý kezinde eskeriletin bolady.
«Qurylys kompanııasynyń ıesi retinde halyq sanaǵy azamattardyń áleýmettik mańyzy bar nysandar men ınfraqurylymǵa degen suranysyn anyqtaýǵa kómektesetinin atap ótkim keledi», – deıdi spıker.
Bul sanaqtyń ereksheligi – saıttaǵy sanaq paraqtarynyń suraqtaryna jaýap bere otyryp, ózińiz týraly derekterdi jelide qaldyrý múmkindigi
Almaty Qoǵamdyq keńesiniń múshesi Tımýr Nurtaev jańa formatty paıdalanyp, sanaqtan onlaın ótkenin tilge tıek etti.
«Qurylysshy retinde maǵan turǵyn úı salýda qoldanylǵan materıal týraly suraq erekshe este qaldy. Bul memleketke halyqtyń ómir súrý deńgeıine, turmystyq ál-aýqatyna baılanysty turǵyn úı qorynyń sapasy týraly naqty túsinik beredi. Tek osylaı ǵana turǵyn úı saıasatynyń, aýmaqtardy damytýdyń eń tıimdi baǵytyn tańdaýǵa, bizdiń turǵyn úıimizdiń seısmıkalyq jáne óńirdiń ereksheligine baılanysty basqa da parametrler turǵysynan qanshalyqty qaýipsiz ekenin túsinýge bolady», – dedi ol.
Sarapshy qazirgi ýaqytta turǵylyqty jeri boıynsha páterlerdi aralaý kezeńi bastalǵanyn jáne qala turǵyndarynan sanaqshylardan jasyrynbaýyn surady.
«Halyq sanaǵy turǵyndardyń tabys deńgeıin, olardyń túrli ıgiliktermen qamtamasyz etilýin tirkeıdi. Osy aqparatsyz memleket járdemaqy mólsherin, ortasha jalaqyny, eseptik kórsetkishti jáne árqaısymyzdyń ál-aýqatymyzǵa baılanysty basqa da derekterdi sanaly túrde josparlaı almaıdy», – dep tolyqtyrdy sózin Tımýr Nurtaev.
«Keri baılanyssyz halyqtyń naqty suranysyn memleket tolyq anyqtaı almaıdy. Sondyqtan memleket pen halyq arasyndaǵy baılanys osy halyq sanaǵy arqyly iske asady. Sanaq barysynda áleýmettik jáne ınfraqurylymdyq sharalardy qalaı júzege asyrý kerektigi aıqyndalady. Demek, sanaqqa jappaı qatysý qajet. Mıtıngige baryp, qur daýryqqansha, sanaqtaǵy suraqtarǵa jaýap berip, ómir súrý sapasyn oń ózgertýge yqpal etýge bolady. Óıtkeni, sanaq suraqtary azamattardyń ómir súrý sapasyn jaqsartýǵa baǵyttalǵan», – dedi sarapshy.