Sarapshy: Qazaqstandyq jastar jumysta jasyna baılanysty kemsitýge tap bolyp júr

NUR-SULTAN. QazAqparat - Qazaqstandyq jastar jumysqa ornalasar kezde jas ereksheligine baılanysty kemsitýge tap bolyp júr. Bul týraly Eńbek resýrstaryn damytý ortalyǵy Strategııa jáne jobalyq basqarý departamentiniń dırektory Aleksandra Molchanovskaıa aıtty, dep habarlaıdy QazAqparat tilshisi.

«Qazaqstanda jastar sany artyp keledi. Biraq sonymen birge olar belgili bir qıyndyqtarǵa tap bolýda. Jasyna baılanysty kemsitý, sapaly bilimniń bolmaýy sııaqty keergiler bar. Al pandemııa olardyń jaǵdaıyn qıyndata tústi. Dúnıejúzilik banktiń baǵalaýy boıynsha, pandemııadan zardap shekken stýdentterdiń tabysy 3% - ǵa qysqarýy múmkin. Saldarynan jyldyq ekonomıkalyq shyǵyn 2 mlrd dollarǵa deıin jetýi múmkin», - dedi Aleksandra Molchanovskaıa.

Onyń aıtýnysha, keleshekte óńdeý ónerkásibinde, kólik, bank salasynda 85 mıllıonnan astam jumys orny avtomattandyrylady.

«Biraq olardyń ornyna jańa mamandyqtar paıda bolady. Al oǵan jaramdy bolý úshin adamdarǵa biliktiligin arttyryp, tehnologııa kóshinen qalmaý kerek», - dedi sarapshy.

Sondaı-aq, onyń aıtýynsha, elimizde 2,2 mln adamnyń onlaın jumysqa kóshýine múmkindik bar.

«Árkim jeke sheshim qabyldap jatyr. Resmı statıstıka boıynsha, qashyqtan jumyspen qamtylǵandardyń sany ázirge az ǵana. Erekshe ınfraqurylymdy qajet etpeıtin, kompıýter men telefon arqyly isteletin jumystardyń kóbi onlaın rejımge yǵysýy múmkin. Al shashtaraz sııaqty adamnyń qolymen isteletin kásipterdi onlaın rejımge jiberý múmkin emes. Ekonomıster men zańgerler, memlekettik basqarý salasynyń mamandary men sarapshylar qashyqtan jumysqa aýysa alady. Búginde olardyń sany – 2,2 mln adam», - dedi Aleksandra Molchanovskaıa.