Sarapshy: Halyq sanaǵy – málimettiń birden-bir senimdi kózi

ALMATY. QazAqparat - Almatyda «Halyq sanaǵy-2021» sharasyna baılanysty D.A.Qonaev atyndaǵy Eýrazııalyq zań akademııasynyń ekonomıka ǵylymdarynyń doktory Patıma Ábdiqulova óz pikirin bildirdi, dep habarlaıdy QazAqparat tilshisi.

Onyń aıtýynsha, almatylyqtar esh alańdamaı, sanaqtan ótýi tıis. Sebebi, sanaq halyqtyń: ekonomıkalyq, áleýmettik, demografııalyq tolyq obektıvti sıpattamalaryn beredi.

«Ádette, sanaqtan keıin tereń áleýmettik-ekonomıkalyq jáne demografııalyq taldaý júrgiziledi. Árqaısysy eskeriledi – jańa týǵan náresteden qart adamǵa deıin. Ol mektepke ne kolledjge bara ma, álde ýnıversıtette oqıdy ma. Resmı túrde ne ózin-ózi jumyspen qamtyǵandar jumys isteıdi, eldegi ishki jáne syrtqy kóshi-qon problemalary anyqtalady», - deıdi sarapshy.

Sanaq qorytyndysy boıynsha memleket azamattardyń qalaı ómir súretini týraly tolyq aqparat alady. Sonymen qatar, bul statıstıka ártúrli bólimderden alatyn aqparatty naqtylaýǵa kómektesedi. Mysaly, nekede turǵan adamdar týraly AHAJ derekterin tekserýge bolady.

«Elimizde qansha kópbalaly otbasy bar ekenin anyqtaýǵa bolady. Eger buryn kóp balaly analar 10-15 bala týǵan áıelder bolsa, búginde tórt bala tárbıelep otyr. Sanaq qorytyndysy boıynsha olar memlekettik qoldaý ala alady. Jumyssyzdardyń aqparaty jumys oryndaryn qurý boıynsha jańa baǵdarlamalar qajet ekenin túsinýge kómektesedi. Zeınetkerler tabysy tómen ekendikterin habarlap, memleketke zeınetaqyny arttyrý qajettigi týraly belgi beredi», - dep jalǵastyrdy P. Ábdiqulova.

Memleket úshin barlyq azamattar týraly aqparat mańyzdy: ortasha aýqaty bar nemese eń tómengi jalaqy alatyn, qart pen jas jáne qujattary joq adamdar.

«Halyqty JSN boıynsha sanaýǵa bolatyn sııaqty, biraq bul tek jeke kýálikte kórsetilgen sandar ǵana. Eski qujattar boıynsha nemese olarsyz turatyn azamattar áli de bar», - dedi sarapshy.

Ekonomıkany damytý úshin memleket halyq týraly naqty statıstıkalyq aqparatqa ıe bolýy kerek. Sondyqtan Patıma Ábdiqulova Almaty turǵyndaryn sanaq rásimine túsinistikpen qaraýǵa, saýalnama suraqtaryna tolyq jaýapkershilikpen jaýap berýge shaqyrdy.

«Biz – birtutas Qazaqstan halqymyz, sanaq derekteriniń nátıjesinde ózimizge aınadaǵydaı qaraı alamyz. Sonymen, halyq sanaǵy – bul eldiń shejiresi, onyń tarıhy. Bizden keıin qalatyn jáne urpaqtar bizdi baǵalaıtyn birneshe obektıvti aqparat kózderiniń biri», - dep qorytyndylady ekonomıka ǵylymdarynyń doktory.