Sarapshy: Gýmanıtarlyq kómek kórsetý –Qazaqstannyń syrtqy saıasatynyń mańyzdy baǵyty
«Qazaqstan halyqaralyq qaýymdastyqtyń jaýapty múshesi retinde jahandyq koronavırýstyq pandemııaǵa qarsy turý jaǵdaıynda seriktes jáne kórshiles elderge ekonomıkalyq qoldaý kórsetý nıetimen qajetti gýmanıtarlyq kómekti jalǵastyrýda. Memleket basshysy Qyrǵyz Respýblıkasymen dástúrli dostyq, odaqtastyq jáne strategııalyq seriktestik qaǵıdalaryn basshylyqqa ala otyryp, Qazaqstan halqy atynan baýyrlas qyrǵyz halqyna gýmanıtarlyq kómek kórsetý týraly sheshim qabyldady. Aýdarylǵan gýmanıtarlyq kómektiń jalpy kólemi 10 myń tonna undy quraıdy. Onyń alǵashqy partııasy Qyrǵyzstanǵa jalpy júktemesi 4500 tonnaǵa jýyq bıdaı unymen osy jyldyń 18 mamyrynda jetkizildi. Gýmanıtarlyq kómekti qabyldaýǵa qatysqan Qyrǵyzstannyń Aýyl, orman jáne sý sharýashylyǵy mınıstriniń orynbasary Azamat Mýkashev qyrǵyz tarapy Qazaqstan Úkimeti kórsetken kómekti joǵary baǵalaıtynyn, kórsetilgen qoldaý úshin zor alǵysyn bildiretinin jáne undy halyqqa, onyń ishinde ásirese áleýmettik jaǵynan nashar qamtylǵan adamdarǵa taratý máselesiniń pysyqtalyp jatqanyn atap ótti», - dedi Ásel Nazarbetova QazAqparat tilshisine bergen suhbatynda.
Onyń aıtýynsha, COVID-19 pandemııasy bastalǵannan beri Qazaqstan qyrǵyz tarapynyń ótinishteri negizinde buǵan deıin de Qyrǵyzstanǵa gýmanıtarlyq kómek kórsetti. Atap aıtqanda, 2020 jyldyń mamyr aıynda 5 myń tonna qazaqstandyq un kórshi elge tegin berildi. Mundaı kómek Tájikstanǵa da kórsetilgen bolatyn. Ár elge jalpy somasy 3 mıllıon AQSh dollarynan asatyn kómek berildi. Odan bólek byltyrǵy jyldyń qarasha aıynda Qazaqstan úkimeti Qyrǵyzstanǵa otandyq óndiristiń 400 dana portatıvti jeldetkishi men 2 mln medıtsınalyq maskalaryn jiberdi.
«Taǵy da aıta ketsek, 14 mamyrda QR Prezıdenti Qasym-Jomart Toqaevtyń tapsyrmasyna sáıkes Qazaqstan men Úndistan arasyndaǵy strategııalyq seriktestik qaǵıdattaryn basshylyqqa ala otyryp, Úndistanǵa kúrdeli epıdemıologııalyq jaǵdaıǵa baılanysty gýmanıtarlyq kómek kórsetildi. Jalpy salmaǵy 40 tonnaǵa jýyq júkke medıtsınalyq maskalar, respıratorlar, qorǵanysh kostıýmderi jáne portatıvti jeldetkishter kiredi. Jalpy, gýmanıtarlyq kómek kórsetý – bul Qazaqstannyń syrtqy saıasatynyń mańyzdy baǵyttarynyń biri», - dedi sarapshy.
Bólim basshysynyń atap ótýinshe, Qazaqstan birqatar elderge sońǵy 20 jyl ishinde damýǵa resmı kómekke uqsas maqsattar úshin 542 mıllıon AQSh dollarynan astam qarjy bóldi.
«Qysqa merzim ishinde Qazaqstan kómek alýshydan Ortalyq Azııanyń basqa elderi men Aýǵanstanǵa kómektesýshi halyqaralyq donorǵa aınaldy. Ceriktes elderdiń áleýmettik-ekonomıkalyq damýy jáne onyń azamattarynyń ál-aýqatyn jaqsartýǵa at salysý maqsatynda «Damýǵa resmı kómek týraly» Qazaqstan Respýblıkasynyń 2014 jylǵy 10 jeltoqsandaǵy Zańyna sáıkes, 2020 jylǵy 15 jeltoqsanda «KazAID» qazaqstandyq halyqaralyq damý agenttigi quryldy», - dedi ol.
Eske salsaq, Qazaqstannyń SІM Qyrǵyzstanǵa gýmanıtarlyq kómek qalaı jetkizilip jatqany týraly aıtty.