Sarapshy Golovkın men «Kanelonyń» kúshin salystyrdy

ASTANA. QazAqparat - Boxingscene.com jýrnalısi Stıven Edvards Daily Bread Mailbag aıdarynda Gennadıı Golovkın (38-0-1, 34 KO) men Saýl Alvares (49-1-2, 34 KO) týraly jazdy, dep habarlaıdy Sports.kz.

«Golovkınde atletızm bar, biraq ony atletıkalyq sportshy dep sanamaǵan bolar edim. Menińshe, ol Marvın Hagler nemese Kostıa Tszıý sekildi dene kúshine súıene otyryp bokstasatyn tegeýrindi pancher. «Kanelo» biraz basqasha. Onyń Golovkınge qaraǵanda atletıkasy basymyraq, biraq bul basymdyq aıtarlyqtaı kóp emes. «Kanelo» daryndylaý. Onyń soqqylary ǵajaıyp. Ol soqqylaryn túrlendire alady. Ol óte úılesimdi judyryqtasady. Biraq sýperatlet emes. Ony Djeıms Tonıge uqsatýǵa bolady», - dep jazady avtor.

Eske sala keteıik, Golovkın men «Kanelo» byltyrǵy qyrkúıekte kezdesken bolatyn. Sol jekpe-jekte tirkelgen teń nátıje kúmándi bolyp, boks jankúıerlerin abyrjytqan. Sodan keıin 5 mamyrda qaıta kezdesedi dep josparlanǵanmen, meksıkalyq boksshynyń dopıng daýyna iligýine baılanysty, Golovkın Vanes Martırosıanmen jekpe-jek ótkizýge májbúr boldy.