Sarapshy: Elimizde eńbekke qatysty daýlar - óte ózekti másele

NUR-SULTAN. QazAqparat - Kelip túsetin árbir úshinshi shaǵym eńbek qatynastaryna baılanysty. Bul týraly Memlekettik qyzmet isteri agenttiginde ótken Ádep jónindegi komıssııanyń birinshi otyrysynda aıtyldy, dep habarlaıdy QazAqparat tilshisi.

«Bizdiń elimizdegi Eńbek kodeksinde demalýǵa, 8 saǵattyq jumys tártibine qarasty máselelerdiń bári qarastyrylǵan. Memlekettik qyzmet isteri agenttigi memlekettik qyzmetshilerdiń jumysyna asa mán beredi. Memlekettik qyzmetshilerge qosymsha jumys istetý kerek bolǵan jaǵdaıda Eńbek kodeksiniń 77-babyna súıenýimiz kerek. Onda qyzmetshiniń jazbasha túrde kelisimi arqyly ǵana qosymsha jumysqa tartýǵa bolatyny jazylǵan. Qosymsha jumysqa tartý barlyq memlekettik organdarda Ádep jónindegi komıtettiń atalǵan bapqa sáıkes bolýyn qadaǵalaýmen júzege asatyn bolady», - deıdi Ádep jónindegi komıssııa múshesi Bıbigúl Nurasheva.

Onyń aıtýynsha, elimizde eńbekke qatysty daý-damaılar - óte ózekti másele.

«Qosymsha jumys júkteý, jumysshynyń quqyǵyn taptaý - kelip túsetin árbir úshinshi shaǵym osyndaı eńbek qatynastaryna baılanysty. Nur-Sultan qalasynyń ózinde ǵana sońǵy jyly jumysshylardyń quqyǵy buzylýyna baılanysty 8 myń shaǵym túsken. Men Ádep jónindegi komıssııa múshesi bolý arqyly jumysshynyń quqyǵyn qorǵaý mádenıeti boıynsha óz úlesimdi qosa alam dep oılaımyn», - deıdi ol.