Sarapshy advokat mamandyǵyn «Dıplommen aýylǵa» baǵdarlamasyna engizýdi usyndy

ASTANA. QazAqparat – Respýblıkalyq advokattar alqasynyń tóraǵasy Aıdyn Bıkebaev saladaǵy máselelerge qatysty usynystaryn jarııalady, dep habarlaıdy QazAqparat tilshisi.

«Biz Qazaqstandyq advokatýrany damytý tujyrymdamasyn (2022 – 2025 jyldarǵa arnalǵan) ázirledik. Eń aldymen, advokatýranyń tolyqqandy kásibı táýelsizdigi turǵysynda qalaı jáne qaı baǵytta áreket isteý kerek ekenin anyqtaǵymyz keldi. Qujatty talqylaý byltyrǵy jeltoqsan aıynda bastaldy. Advokattar keń aýqymda qatysyp, bıyldyń sáýir aıynda Respýblıkalyq advokattar alqasynyń tóralqasy tujyrymdamany bekitti. Tujyrymdama 16 bólimnen turady. Onyń ishinde «myqty advokatýra», «advokatýranyń táýelsizdigi», «advokat pen prokýrordyń tepe-teńdigi», «advokat mártebesin nyǵaıtý», «advokattyń tıisti eńbekaqysy», «advokat qyzmetiniń naqty kepildikteri», «advokattardyń áleýmettik máseleleri» sekildi baǵyttardy sheshý joldary qamtyldy», - dedi Aıdyn Bıkebaev Májiliste advokatýra taqyrybyna arnalǵan dóńgelek ústel otyrysynda.

Onyń aıtýynsha, myqty advokatýra baǵytynda Respýblıkalyq advokattar alqasynyń organdaryn qaıta jasaqtaý, yntalandyrý júıesin engizý jáne olardyń jumysyn demokratııalandyrý eskerilgen.

«Biz jumys organdaryn qaıta qurdyq, osy oraıda Ǵylymı-konsýltatıvtik keńesimiz bar. Sonymen qatar, Advokattardyń kásibı quqyqtaryn qorǵaý jónindegi komıssııamyz jasaqtalǵan. Qazirgi kezde olar jaqsy jumys istep jatyr. Bıyl olardyń erejelerin qaıta bekitip, qarajat bóldik. Jumys organdarynyń sheshimderi múshelerdiń pikirlerin eskere otyryp, alqaly tártipte qabyldanady», - dedi A. Bıkebaev.

Onyń sózine qaraǵanda, advokatýranyń táýelsizdigin qamtamasyz etý úshin úsh negizgi máseleni sheshý kerek.

«Birinshiden, advokattarǵa qatysty tártiptik is júrgizý máselelerin advokatýraǵa tolyǵymen berý. Qazirgi kezde advokat óz mamandyǵynan eki jolmen májbúrlep shyǵarylýy múmkin. Osy oraıda Ádilet mınıstrligi talap qoıǵan kezde jáne advokattardyń tártiptik komıssııasynyń sheshimi negizinde iske asyrylady. Biz tártiptik komıssııasynyń sheshimi boıynsha ǵana qaraýdy usynamyz. Respýblıkalyq advokattar alqasy janynda 11 músheden turatyn tártiptik komıssııa bar. Ekinshiden, mamandyqqa kirý máselesin sheshýdi de advokattarǵa berý kerek. Attestattaý jónindegi komıssııa músheleriniń basym bóligi, ıaǵnı onyń tóraǵasyn qosa alǵanda mindetti túrde advokat bolýy tıis», - dedi Respýblıkalyq advokattar alqasynyń tóraǵasy.

Sonymen qatar ol Respýblıkalyq advokattar alqasynyń ishki normatıvtik aktilerin ókiletti organmen kelisýdi alyp tastaý kerek ekenin atap ótti.

«Advokattyń táýelsizdigi boıynsha tıisti usynystardy daıandadyq. Advokattardyń eńbekaqy deńgeıin aıqyndaý kezinde memleket kepildik beretin zań kómegi júıesi boıynsha qylmystyq protsesti júrgizetin organdarǵa táýeldiligin alyp tastaý qajet. Qazirgi ýaqytta tergeýshi men sýdıa advokattyń eńbekaqy deńgeıin anyqtaıtyn qaýly shyǵarady. Advokattardyń quqyqtary men kepildikterin buzý jónindegi shaǵymdardy qaraýdyń arnaıy tártibi belgilenýi tıis. Munymen qosa, salyq salý salasyndaǵy advokattardy kemsitetin normalardy joıý kerek. Budan bólek, advokattyń jumysyna tómen aqy tóleý tártibin de joıǵan jón. Bul problemalardy sheshpesek, memleket advokattardyń máselesine bet burdy dep aıtý qıyn», - dedi Aıdyn Bıkebaev.

Onyń paıymynsha, advokat mamandyǵyn «Dıplommen aýylǵa» jobasyna engizý kerek.