Sarapshylar: Ulybrıtanııa energetıkalyq daǵdarysqa ushyraýy múmkin

<p><strong>LONDON. KAZINFORM - Brıtan energetıkalyq daǵdarys jónindegi komıssııanyń esebine sáıkes, Tumandy Albıon taǵy bir energetıkalyq daǵdarysty bastan keshýi múmkin, dep habarlaıdy Kazinform tilshisi.&nbsp;</strong></p>

Energy UK, Citizens Advice jáne Brıtan ónerkásip konfederatsııasynyń sarapshylarynan turatyn top eldiń energetıkalyq júıesindegi osal tustaryn tizbeledi. Olar: gazǵa táýeldilik, jańartylatyn energııa kózderin jetildirmeý jáne energııaǵa suranysty qanaǵattandyrý baǵytyndaǵy jumystardyń jetkiliksizdigi.

Komıssııa osy jyldyń basynda 2021-2022 jyldardaǵy energetıkalyq daǵdarystyń Ulybrıtanııa úı sharýashylyqtary men kásiporyndaryna tıgizgen keri áserin baǵalaý úshin qurylǵan bolatyn. Bul daǵdarystyń Ýkraınadaǵy jaǵdaımen shıelenisip, energııa baǵasynyń kúrt ósýine ákelgeni belgili. Osy kezeńde Ulybrıtanııa jylytý jáne elektr energııasyn óndirýde gazǵa táýeldilikten Eýropada kósh bastaǵan elderdiń biri boldy.

Esepte, sonymen qatar, Ulybrıtanııa turǵyn úı qorynyń energııa tıimdiligin arttyrý baǵytynda baıaý ilgerilep jatqany baıandalǵan. Sondaı-aq jańartylatyn energııa kózderin keńeıtý múmkindikteri qaperden tys qalǵany týraly da aıtylǵan.

Nátıjesinde brıtanııalyq úı sharýashylyqtary aıtarlyqtaı qarjylyq qıyndyqtarǵa tap boldy: on adamnyń toǵyzy energııany tutynýdy azaıtyp, 7,5 mıllıony janarmaı tapshylyǵyna kezikti. Kásiporyndar da zardap shegip otyr. Olardyń keıbiri jumysyn toqtatty, al basqalary energııa shyǵyndarynyń ósýimen kúresý úshin jıǵan aqshalaı qorlaryn jaratty.

Komıssııa úkimettiń turaqsyz gaz naryqtaryna táýeldilikti azaıtý jáne otandyq jańartylatyn energııa kózderin paıdalanýdy yntalandyrý baǵytynda shuǵyl sharalar qabyldaýǵa shaqyryp otyr. Ol sondaı-aq osal toptarǵa jatatyn úı sharýashylyqtary men kásiporyndardy qoldaý baǵdarlamalaryn jaqsartýǵa, sondaı-aq úılerdi jyly ustaý úshin energııa tıimdiligin arttyrýǵa úndedi.