Sarapshy: JI-di tez meńgergen el alǵash atqa mingen halyq sekildi, ústemdigi artady

<p>ASTANA. KAZINFORM &ndash; Jasandy ıntellektini birinshi meńgergen el atty alǵash qolǵa úıretken halyq sekildi: áýelde atty úıretkenderge qaýip kóp bolady, keıin atqa minýdi úırenbegenderge qater artady. Bundaı pikirdi Astana Hub bas dırektorynyń keńesshisi Danabek Qalıajdarov aıtty.</p>

— JI-den keletin qaýip jaıly aıtsaq, meniń bir únemi qoldanatyn allegorııam bar. 6 myń jyl buryn bizdiń ata-babalarymyz Eýrazııa tósinde jylqyny alǵash qolǵa úıretti. Ol zamanda da biraz adam jabaıy jylqyny úıretý qaýipti dep aıtqan bolar. Biraz adamnyń asaý úıretý kezinde qulap, jaraqat alyp, japa shekkenine de senimdimin. Ekinshi jaǵynan alǵanda, keıin osy atqa minýdi úırenbegen qaýymdar odan da úlken qıynshylyqqa tap bolyp, odan da zor qaýipke dýshar boldy. 12-13 ǵasyrda mońǵoldar jarty álemdi, búkil Eýropany osy attyń arqasynda jaýlap aldy, - deıdi sarapshy.

Jasandy ıntellektiden keletin qaýip-qater jaıly aıta kele maman ony da birtindep jetildirip, úırenýge bolatynyn túsindirdi.

— Jasandy ıntellektiniń qulaǵynda oınaý úshin birneshe maman bolý kerek. Men algorıtm boıynsha maman bolsam, meniń janymda IT-qaýipsizdik boıynsha maman bolýy kerek. Memlekettik turǵydan aqparattarymyzdy qoldanatyn jasandy ıntellekt jasap jatsaq, ol jaqta «er-toqym jasaı alatyn» da, ony durys «qorektendire» alatyn da, durys «taǵalaı» alatyn da adam kerek. Bul jylqy sharýashylyǵynan da kúrdeli, aýqymdy sala bolǵandyqtan, ondaǵy mamandardyń sany da birneshe ondaǵan, tipti júzdegen bolýy múmkin. Bir nárse anyq, biz qalaı da «atqa minýimiz» kerek. Al mine almaı qalǵandar ekonomıkalyq turǵydan artta qalady, - deıdi Danabek Qalıajdarov.

Aıta keteıik, buǵan deıin alaıaqtar JI-di qoldanǵan jaǵdaıda qalaı qorǵaný kerektigin jazǵan bolatynbyz.