Sarapshy qarǵyn sýdan qıraǵan úıdi salýǵa jumsalatyn qarjy kólemine pikir bildirdi

<p>ASTANA. KAZINFORM &ndash; Birikken rıeltorlar qaýymdastyǵy prezıdentiniń keńesshisi Nına Lýkıanenko qarǵyn sýdan qıraǵan bir úıdi salýǵa jumsalatyn qarajat kólemine qatysty pikir bildirdi.</p>

«Qurylysshy emespin. Sondyqtan baspanany salýǵa jumsalatyn materıaldar qunyn baǵalaý úlken qıyndyq týdyrady. Degenmen, qurylys barysyndaǵy shyǵynnyń basym bóligi ınjenerlik jeli men kommýnıkatsııalar tartýǵa baılanysty ekendigin atap ótkim keledi. Munan bólek, jer ýchaskesiniń 1 sharshy metriniń quny da áser etetindigi eshkimge daý týdyrmaıtyndyǵy anyq. Alaıda, baspanalar óńirlerde salynatyn bolǵandyqtan qazirgi ýaqytta kózdelgen qarajat tolyǵymen jetkilikti dep oılaımyn», - dedi Nına Lýkıanenko agenttik tilshisine bergen pikirinde.

Aıta keteıik, keshe Úkimet otyrysynan keıingi brıfıngte Qurylys jáne ónerkásip mınıstri Qanat Sharlapaev qarǵyn sýdan jaramsyz bolyp qıraǵan 1 úıdi salýǵa qansha qarajat bólinetindigin málim etken bolatyn.

«Qazirgi tańda búkil ákimdikterden túsken aqparattardy jınaımyz. Sol aqparat boıynsha jergilikti atqarýshy organdardyń bıýdjetinen, odan keıin respýblıkalyq bıýdjetten qarajat bólemiz. 80 sharshy metrlik bir úıdiń qunyn 22 mln teńge dep baǵalap otyrmyz. Bir sharshy metri - 281 myń teńge», - degen edi mınıstr.