Sapta turǵanda esinen tanyp, qaıtys bolǵan sarbazdyń ólimine kináli anyqtaldy

TARAZ. QazAqparat - Jambyl oblysynyń Otar aýylynda ornalasqan áskerı bólimde qaza tapqan mańǵystaýlyq Álibek Qalbaıdyń ólimine kináli anyqtaldy, dep habarlaıdy QazAqparat tilshisi.

Sarbazdyń ólimine atyraýlyq Aıbolat Amanjolov kúdikti dep tanylyp, ol Almatydaǵy tergeý ızolıatorynda otyrǵan bolatyn. Búgin Almatyda áskerı sotta Aıbolat Amanjolovqa qatysty sot úkimi shyqty. Ol qylmystyq kodekstiń 440-baby, 4-bóligi boıynsha kináli dep tanylyp (Áskerı qyzmetshiler arasynda baǵynyshtylyq qatynastar bolmaǵan kezde olardyń arasyndaǵy ózara qarym-qatynastardyń jarǵylyq qaǵıdalaryn buzý), 9 jylǵa bas bostandyǵynan aıyryldy.

Eske salaıyq, Álibek Qalbaı ótken jyldyń 22 sáýirinde sapta turǵan kezde kenetten esinen tanyp qulaǵan. Almaty garnızonynyń áskerı soty Jambyl oblysyndaǵy áskerı bólimge kelgen soń tórt kúnnen keıin qaıtys bolǵan Álibek Qalbaıdyń isin qaıta tergeýge jibergen bolatyn. Sottalýshylar men jábirlenýshiler 18 jastaǵy jaýyngerdiń qazasy týraly isti tergeý nátıjesimen kelispeı, qaıta tergeýge jiberýdi suraǵan.

Álibek Qalbaı isine baılanysty sot byltyr 23 tamyzda bastalyp, osyǵan deıin 17 otyrysy ótken bolatyn.

Bul máselege qatysty QazAqparat buǵan deıin Jas sarbaz Álibek Qalbaıdyń ólimi: Eki áskerı shendi qyzmetten qýyldy dep jáne Áskerı qyzmetshi Álibek Qalbaıdyń ólimine qatysty kúdikti ustaldy dep habarlaǵan bolatyn.