Sapporoda turatyn qazaq qyzy: Osy elde tursaq ta qazaq sportshylaryna jankúıermiz
Búgin hokkeıden Qazaqstan quramasy Kúnshyǵys eliniń sportshylarymen altynǵa talasty. Stadıon ishi jergilikti jankúıerlerge lyq toldy. Osy kezde alystan qazaq eliniń kókbaıraǵyn jelbiretip otyrǵan bir top adamdy kózimiz shalyp qaldy. Nede bolsa, jaqyndap baryp, kim ekenderin bilýge jaqyndaı tústik.
Aldarynan júzderine qarap óte bergenimiz sol edi, «mynaý qazaqtyń balasy ǵoı» dep jasy seksenniń seńgirine shyqqan apamyzdyń daýysy sańq etti. Burylyp sálem berip, jón surasa kettik. Negizi, Sapporoǵa kelgende osy qalada oqyp jatqan qazaqstandyq stýdentter bolsa, sportshylarymyzǵa jankúıerlik tanytyp keletin shyǵar, kóretin bolýymyz múmkin dep oılaǵan edik. Alaıda, jastardan eshkimdi kezdestire almaǵanbyz. Esesine jetpisten asqan apamyzdy kórip tań qaldyq.
- Apa, qaı jaqtan júrsiz? Kim bolasyz?
- E, qulynym, qazaqtyń júrmeıtin jeri bar ma? Osynda qyzym men kúıeý balam turady. Eki jıen nemerem bar. Solardy kóreıin dep Almatydan keldim. Azıada oıyndary bastalǵannan beri qazaq sportshylaryna jankúıer bolyp, jarystarda júrmin.
- Aty-jónińizdi tanystyra ketseńiz?
- Esimim - Roza, tegim - Qaıyrbaeva. Almatyda uzaq jyl ustazdyq qyzmette bolyp, zeınetkerlikke shyqtym. Ál-Farabı atyndaǵy Qazaq ulttyq ýnıversıtetinde 50 jyl sabaq bergemin. Ózim fılologııa ǵylymdarynyń doktory, dotsentpin. Sen sııaqty talaı jýrnalısterdi óz qolymmen ushyrǵan adammyn. Qazir jasym seksenge keldi. Kezinde kúıeý balam qyzymdy alyp osylaı ketti de, qalyp qoıdy.
- Bul jaqqa ne sebepten ketip edi?
- Ózim de ǵylym men bilimniń adamymyn. Bular da sol bilim qýyp ketken ǵoı. Ol tusta bizdegi ómir basqasha boldy. Sosyn joǵary bilimi bar, shet tilin meńgergen jastar oqyǵan jerlerinde qalyp qoıdy ǵoı.
- Qazir balalaryńyz qaıtqysy kelmeı me?
- Balam ony ózderinen sura. Mine, mynaý qasymdaǵy qyzym, art jaǵymda otyrǵan kúıeý balam.
Apamyz osylaı áńgimesin aıtyp kele jatty da, sóz tizginin qyzyna berdi.
- Meniń aty-jónim Jannat Tólekbaeva. Sapporoda turǵanymyzǵa 26 jyl boldy bıyl. Anam osylaı jylyna bir kelip ketedi. Ózimiz de elge jıi-jıi baryp turamyz.
- Qazir Japonııa azamatysyzdar ma?
- Iá. Bul jaqqa úırenip kettik. Joldasymnyń da, meniń de jumysym osynda. Eki balamyz bar, biri osy jaqtan joǵary bilimin alyp, qazir Almaty da qyzmet istep jatyr. Al ekinshisi qolymyzda. Bulaı ne úshin ketkenimizdi anam aıtty ǵoı.
- Qandaı jumys isteısizder?
- Joldasym buryndary osyndaǵy Qazaqstan elshiliginde azdap qyzmetter atqardy. Áli de óziniń atqaratyn jumystary bar. Mine, osy Azıada oıyndaryn uıymdastyrý músheleriniń basty tulǵalarynyń biri. Onyń syrtynda joldasymnyń jeke kompanııasy bar. Ol kompanııa negizinen Japonııa men Qazaqstan arasyna jumys isteıdi. Al ózim osyndaǵy joǵary oqý oryndaryna orys tilinen sabaq beremin. Onyń syrtynda sheteldik dıplomattardyń qatysýymen ótetin iri is-sharalarda aýdarmashy bolyp qyzmet etem.
- Endi elge birjola kóshkilerińiz kelmeı me?
- Ázirge ondaı oı joq. Qazir den saý bolsa, qurlyqtyń arǵy beti ana taýdyń teriskeı betindeı ǵana bolyp qaldy ǵoı. Qazaqstan bizge alys bolmaıdy. saǵynǵan kezderde baryp turamyz.
- Myna ótip jatqan Azıada oıyndaryndaǵy qazaqstandyq sportshylardyń jetistikterine kóńilderińiz tolyp jatyr ma?
- Árıne, tolady. Mine, búgin Japonııany jeńip jatyr (hokkeıden Qazaqstan men Japonııa arasyndaǵy fınaldy aıtyp jatyr - avtor). Basqa da jarystarǵa baryp kórdik. Qazaq sportshylary júldege ilinip jatsa, qatty qýanyp aıǵaılap ketemiz. Al jeńilip qalsa, kádimgideı kóńilimiz túsip qalady.
- Jarys bastalǵannan beri jankúıer bolyp kelesizder me?
- Iá. Qaıda júrsekte qanymyz, janymyz qazaq emes pe?! Bir búıregimiz burylyp turady jerlesterime. Sondyqtan, qaıda júrsekte qazaqtyń bási bıik bolǵanyn qalaımyz.
- Áńgimeńizge kóp rahmet!