Sapasyz joldarǵa qatysty qylmystyq ister qozǵaldy - mınıstrlik

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi jergilikti jol sapasy tómen óńirlerdi atady, dep habarlaıdy QazAqparat tilshisi.

«Mınıstrlik jol qurylysynyń sapasyn jaqsartý úshin júıeli sharalar men jańa tásilderdi ázirleýde. Eń aldymen, kepildik kezeńinde aqaýlar paıda bolǵan jaǵdaıda tehnıkalyq, avtorlyq qadaǵalaý jáne tapsyrys berýshiniń jaýapkershiligin kúsheıtý kózdeledi», - dep jazylǵan baspasóz qyzmetiniń habarlamasynda.

Budan basqa, sapany qamtamasyz etip, jergilikti atqarýshy organdarǵa qarjylyq táýeldikti joıý úshin «Kólik týraly» zań jobasy sheńberinde biryńǵaı shartqa qol qoıý tetigi ýákiletti organmen jáne Sapa ortalyǵymen pysyqtalatyn bolady. Bul shartqa qaramastan ákimdikterge eskertý berýge jáne olardyń mindetti túrde oryndalýyn talap etýge múmkindik beredi.

«Bıyl jergilikti joldardyń sapasyna baqylaý júrgizý barysynda 9 myńǵa jýyq synama alyndy, olardyń 2,5 myń synamasy nemese 28%-y talaptarǵa saı kelmeıdi. Sáıkessizdik boıynsha– Shymkent (71%), Mańǵystaý (61%), Almaty (56%), ShQO (49%), BQO (43%), Túrkistan qalasy (40%). Eskertýlerge qaramastan, tapsyrys berýshiler obektilerdi qabyldaýda. Mundaı faktiler boıynsha keıbir óńirlerde qylmystyq ister qozǵalýda», - dedi mınıstrlik.

Sonymen birge mınıstrdiń aıtýynsha, qarjylandyrýdy tepe-teń bólý máselesi ózekti bolyp otyr. Mindettemelerge qaramastan jekelegen oblystar bul talaptardy saqtamaıdy (BQO, SQO, Qostanaı, Pavlodar).

«Mysaly, Prezıdent tapsyrmasyna qaramastan, Batys Qazaqstan oblysynda jergilikti joldardy damytý qarqyny tómen. Ótken jyldyń qorytyndysy boıynsha respýblıkanyń ortasha kórsetkishi 80% bola tura óńirdegi joldardyń normatıvtik jaı-kúıi 39%-dy qurady. Batys Qazaqstan oblysyna bıyl 2,6 mlrd teńge bólindi, bul barlyq bıýdjettiń 10%-yn qurap otyr», - deıdi Indýstrııa mınıstrligi.