Sapasyz jol: 2 merdiger lıtsenzııadan aıryldy, 17 tehnıkalyq qadaǵalaýshy qyzmetin toqtatty

ASTANA. QazAqparat – Bıyl 9 aıda 10 myńǵa jýyq jol qurylysy sapasyn tekserý jumysy júzege asyryldy. Bul týraly Májilistegi Úkimet saǵatynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Jol jóndeý jumystarynyń sapasyna jáne avtojoldardyń jaı-kúıin dıagnostıkalaýǵa erekshe nazar aýdarylyp otyr. Respýblıkalyq joldar boıynsha jumystar men materıaldardyń sapasyna saraptama respýblıkalyq bıýdjetten bólingen qarajat esebinen júzege asyrylady jáne búkil jelini tolyǵymen qamtıdy. Jergilikti joldar boıynsha qarajat jergilikti bıýdjetten jergilikti atqarýshy organdardyń qalaýy boıynsha kózdeledi. 9 aıda 10 myńǵa jýyq jol tekserý jumysy júzege asyryldy», - dedi Q. Óskenbaev.

Osy oraıda ol talaptardy buzýdyń 5,1 myń deregi anyqtalǵanyn aıtty.

«Júrgizilgen saraptama nátıjeleri boıynsha 2 jol salý jáne jóndeý jónindegi merdiger uıym lıtsenzııasynan aıyryldy. Tehnıkalyq qadaǵalaýdy júzege asyratyn 17 ınjenerdiń qyzmeti toqtatyldy. Tehnıkalyq qadaǵalaý qyzmetteri men merdigerlerge 29,3 mln teńge aıyppul salyndy», - dedi Q. Óskenbaev.

Bul turǵyda merdiger uıymdar 2 mlrd teńge somasyna jumystardy qaıta júrgizdi.

Buǵan deıin mınıstr málim etkendeı, jyl sońyna deıin shamamen 1 myń shaqyrym joldy paıdalanýǵa berý josparlanyp otyr.